Goal khung thei bik striker Erling Haaland-a'n Manchester City kawr hain Pathianni zan hian Premier League-ah a inlan dawn. Pep Guardiola hote hian Pathianni zan dar 9:00-ah West Ham an hmachhawn dawn a, an inkhelna tur hi London Stadium a ni.
Champion lai Man City bul ṭanna tur hi fixtures a awlsam a ni lo a, Hammers hi season liam ta khan pariatna niin Europa Conference League-ah an inlan dawn. Nikum November thla tawp khan City hian an mualah Hammers hi 2-1 in an hneh hram a, October thlaa League Cup last 16-ah erawh hun pangngaiah 0-0 niin penalty shootout-ah David Moyes hote an vannei zawk.
London Stadium bika an inkhelh hnuhnun ber chu kumin May 15 kha a ni a, champion tura point thum mamawh Man City chu West Ham hian 2-2 in an chelh a, Guardiola hote tan point thum a chiang lo.
Man City hi champion lai ni mah se player pawimawh ni pha Raheem Sterling leh Gabriel Jesus bakah Oleksandr Zinchenko te an chhuak. Chutihrualin rinrawl ni thei tur Erling Haaland leh Kalvin Phillips te an lalut. City hian Premier League bul ṭan hmaa an khelh ṭhin Community Shield-ah an elpui Liverpool chu 3-1 in ngawtin an hneh lo a, striker thar Haaland a 'nil'.
Inkhel entu mit fukna tur chu kum 22 mi Haaland a ni a, Norwegian striker hi goal khung tura beisei a nih avangin pressure a ngah dawn. Chutihrualin City hi transfer hun zawh hma chu an la buai ve dawn niin a lang. City-in tlarhnung thuam ṭhat an la mamawh a, kum 27 mi Bernardo Silva chuan kum 2025 thleng daih contract nei mah se chhuak thei tura sawi a ni. 
Pep-a'n champion nomawi humhim turin kawng bum boh a hmachhawn hmasa a, hun harsa pumpelh dan erawh result ṭha neih a ni. Man City hian Hammers hi an hneh chuan an kawng zawh hi a mam chho thei ang.