Old Trafford-ah Ten Hag hun a inṭan

Manchester United-in August 7, Pathianni zan dar 6:30 hian Brighton & Hove Albion an mikhual dawn a, manager thar Erik ten Hag hnuaia an competitive match hmasa ber an khelhna tur hi Old Trafford a ni.

Season dang ang bawkin Man United ṭantuten beiseina sang tak nen bul an ṭan dawn a, tun season-a an innghahna chu Dutch manager hi a ni. Amaherawhchu Ajax champion puitu Ten Hag tan pawh bul ṭan a awlsam dawn lo.

Friendly match-ah Ten Hag-a'n Anthony Martial a hmang nasa a, French forward hi malpui hliam vangin a khel thei dawn lo. Squad thlir chuan season liam taa goal 24 khungtu Ronaldo chu hming langsar a ni a, mah se Portugal forward hi a la inpeih lo niin a lang.

Rayo Vallecano nen friendly match an khelh ṭumin Ronaldo hi an thlak hnuah a haw a, Ten Hag-a'n a lawm loh thu a sawi chhuah bakah a fitness a ṭhat loh thu a sawi. Hemi a nih avang hian pre-season tour-a zin ve lo Ronaldo hi bench-ah a awm rinawm zawk.

Dutch manager Ten Hag-a'n striker atan tu nge a chhawr dawn tih hriat a châkawm a, chutiang bawkin tlarhnunga ding tur pawh hriat châkawm tak a ni. Captain Harry Maguire kawppui theih chu Victor Lindelof, Raphael Varane leh Ajax aṭanga an lakluh Lisandro Martínez te an ni.

Midfield-ah Bruno Fernandes chu rinrawl a la ni reng dawn a, Christian Eriksen nen an inkawp rem thei ang em, tih chu zawhna a tling. Season liam ta khan Jadon Sancho leh Marcus Rashford ten beisei an pha lo a, nipui bazar hmang ṭha tawk lo Man United-in player theihna nei sang pahnihte hi an theihna anga an khelh chhuah an beisei ang.

Ten Hag leh a hote hi point thum hmu tura beisei an ni a, mah se season liam ta an result thlir chuan chak chiang saa dah a rem lo. Seagulls hian 4-0 ngawtin Man United hi an sawp a, Amex Stadium-ah manager lailawk Ralf Rangnick hoin an hawi buai hle.