Community Shield nomawi nen Liverpool-in season bul an ṭan a, Premier League-a an elpui ber tura ngaih Manchester City chu 3-1 in an hneh - vawiin tlai dar 5:00-ah Reds hian tun season-a an league match hmasa ber an khel dawn a, khualmualah Fulham an lenchilh ang. 
Season ṭantir aṭangin hliamin Liverpool a tlak buak nghal a, zaninah hian hliam vangin Diogo Jota, Caoimhin Kelleher leh Alex Oxlade-Chamberlain an inlan thei dawn lo chiang a, Ibrahima Konate, Kostas Tsimikas leh Curtis Jones dinhmun a chiang lo bawk. 
Reds tana chanchin lawmawm erawh keeper Alisson a lo kir tawh chu a ni a, Brazilian keeper hian zaninah si ban a nghah theih dawn avangin Fulham tlarhma tan hna a hautak sawt dawn. 
Jurgen Klopp-a'n nipui transfer-ah Darwin Nunez, Fábio Carvalho leh Calvin Ramsay a lalut a, player pathum hian zaninah inkhel bul an ṭan erawh a la beiseiawm chiah lo. 
Nunez hian City lakah goal khungin Liverpool tan a hming a rawn chher nghal a, mahse, Jurgen Klopp-a fimkhur miau avangin a 'system' la bel lo Uruguayan striker ai chuan Roberto Firmino-a'n bul a ṭan a rinawm zawk. 
Chuti a nih chuan tlar hmaah Mohamed Salah, Luis Diaz leh Firmino an awm dawn tihna a ni a, a fuh tawk loha lut tura Nunez a awm dawn bawk avangin Fulham tlarhnung an intuaihriam a ṭul ang. 
Reds hian Community Shield-a City hnehtu aṭangin an thlak danglam vak a rinawm lo a, tlarhnungah Trent Alexander-Arnold, Joel Matip, Virgil van Dijk, Andy Robertson-te awmin, midfield-ah captain Jordan Henderson, Fabinho leh Thiago Alcântara te inkawp leh tura ngaih an ni. 
Fulham-in Premier League an inpetkai theih nana player thawhhlawk tak Carvalho-a'n Reds a pansan a, mahse, season hmasa championship-a goal 43 khungtu Aleksandar Mitrovic an la neih avangin beiseina erawh neih thiang a ni.