Mr. Chelsea 'Azpi' a cham zel dawn

Chelsea captain Cesar Azpilicueta chuan Barcelona sawmna hnarin Chelsea tana rinawm a thlang a, Stamford Bridge-ah season hnih dang khelh chhunzawm turin contract thar a ziak.

Kum 32 mi right back hian Chelsea-ah hian kum khat contract a la nei a, mahse, nipui transfer-ah Barcelona nen an inbia - Catalan club a pan ngei rinna a lian hman hle.

Mahse, kum 2012-a Marseille aṭanga Chelsea zawmtu defender hian an rama kir ai chuan London club tana rinawm a thlang ta a, kum 2024 thleng a khel ang.

Azpilicueta chuan, "Chelsea hian min hmangaih tih ka hria a, kan hmachhawp tharte hian min tiphur hle bawk. Kan zinkawng zawh chhunzawm zel turin ka inpeih a, he club captain ka ni thei hi ka inchhuangin, sulhnu chhinchhiahtlak kan hnutchhiah zel ka beisei," a ti.

Club neitu thar Todd Boehly hnuaiah Chelsea an indinthar mek a, nimin khan Brighton & Hove Albion aṭangin Marc Cucurella chu pound maktaduai 60 chuangin an lalut - kum ruk chhung atan contract an ziahpui. Spanish full back hma hian Raheem Sterling(£50mtd), Kalidou Koulibaly (£34mtd), Carney Chukwuemeka (£20mtd) leh goalkeeper Gabriel Slonina (£12mtd) an lalut tawh a, Slonina hi an leina club Chicago Fire-ah loan-in January thleng a khel dawn thung.

Chelsea hian zanin dar 10:00-ah an club legend Frank Lampard enkawl Everton an lenchilh dawn a, Blues jersey nena Premier League-a Sterling che vel tur hi mipui hmuh châk a ni.