Premier League dan thar
Substitution panga:
Match khatah substitution pathum ni tawh loin substitution panga a ni tawh dawn. Premier League-ah 2019-20 season season khan Covid-19 vangin he dan hi hman a ni tawh a, Europe league dangten hmang zui mah se substitution pathumah an let.
June thla khan football dan siamtu IFAB chuan substitution pathum aṭangin pangaah an thlak a, Premier League pawhin an hman ve a ṭul ta. Team ṭha leh squad chhah ṭha tan ham ṭhatna tura ngaih a ni a, chutihrualin an hman hmasak zawk ṭum khan player pathum thlak kim loh an ngah zawk.
Substitution panga hi vawi thumah thlak tur a ni a, halftime-a player thlak chhiar tel a ni lo.
Ball assistants:
Match khatah ball sawm hman a ni dawn. Ball pakhat chu inkhelh laia hman tur a ni a, pakhat dang leh chu fourth official bulah a awm ang. Field sirah ball assistant pariat an awm ang a, chung ho chuan ball pakhat ṭheuh an kawl dawn. Hei hi hun khawhral tur ven nana tih a ni.
Thlasik chawlh:
November leh December thlaah FIFA World Cup khelh a ni dawn. Qatar-ah player ṭhahnem tak an zin dawn avangin Premeir League-in thlasik chawlh kar ruk ngawt an nei dawn a, hei hi thil thar a ni. Team ṭhenkhatin an chhiatpui ang a, team ṭhenkhatin an ṭhatpui ang.
Penalty dan thar:
IFAB chuan penalty pet dan thar an siam. Dan hluiah chuan penalty pet laiin goalkeeper-in a ke pakhat zawk talin goalline a rah a ngai. Dan tharah erawh goalkeeper tana ham ṭhatna tur an siam.
Penalty pet laiin goalkeeper-in a ke pakhat zawk talin goalline a khawih emaw goalline hnunga a awm emaw phal a ni.
Chumi awmzia chu goalline hmaa ke dah chu phal a la ni chuang lo a, chutihrualin goalline rah kher a ngai tawh dawn lo. Goalkeeper-in dive tura insiamrem theih nan goalline hnungah an awm thei tawh a, an duh thlanna a ni tawh ang.
Offside dan thar:
Offside chungchangah pawh IFAB-in dan an her rem hret a, dan thlak danglam loin offside dan hmang an sawifiah a ni ber zawk. Offside position-a awm attacking player chu defending player-in ball a khawih avangin 'onside' thei tawh dawn lo.
Hemi chungchang entirna ṭha tak chu Nations League final-a Kylian Mbappe goal khung kha ni. Final-ah Spain leh France an inkhel a, 1-1 an inhnehtawk laiin minute 80-naah Theo Hernandez-a through ball chu offside position-a awm Mbappe-a'n um lutin goal-ah a chantir. VAR hmanga enlet a nih hnuah Hernandez-a through ball hi Spain defender Eric Garcia-a'n a tawh avangin Mbappe goal hi pawm a ni. Dan tharah chuan Mbappe goal ang hi pawm a ni tawh lo ang.
Dan tharah hian 'deliberate play' tih lai chu sawifiah chian a ni. Hernandez-a hian tum reng vanga ball pe a ni a, chuvangin offside hi Hernandez-a ke aṭanga a chhuah lai tak hmangin teh tur a ni. Chutihrualin Eric Garcia erawhin ball dan a tum a, Mbappe pass a tum loh avangin Spain defender ball khawih khi en tel a rem tawh lo.