Galtier hoin PSG an inlan dawn

Christophe Galtier enkawlna hnuaiah Paris Saint-Germain chuan French Ligue 1 season an ṭan dawn, an match hmasa ber atan zanin dar 12:30 hian Clermont an lenchilh dawn, point thum nena bul ṭan an tum ang.

French champion hian Lionel Messi, Neymar leh Kylian Mbappe te an nei a, tlarhma lam an ṭha tawk. Tlarhnungah tawnhriat nei ṭha Sergio Ramos hoin season bul an ṭan thei dawn, nikum aiin beisei an nei sang zual dawn.

Inbuatsaihna ṭha
PSG manager thar Galtier chuan, "Rilru leh taksa lamah inbuatsaihna kan nei ṭha hle. Pre-season kha kan thlir kir a nih chuan, kan inkhelte kha stadium khat tlatin entu an awm ṭhin, chuvangin match pangngai nen a danglam lem lo.

"Player ten an khelh dan tur pangngai ang takin an khel hlawm a, chuvangin a takah pawh kan buai ka ring lo. Team in man leh inpawh ṭha sa enkawl chhunzawm ka ni a, tun hma aiin inpumkhatna tih ṭhat zual chu kan tum tur a ni," a ti.

Galtier hian season hmasa aiin Messi hman ṭangkai zual an tum thu a lo sawi tawh. Barcelona captain hlui hi pre season-ah pawh team khaidingtu a ni a, zaninah pawh tlarhma chauh ni loin ball sem kual thlengin a ṭangkai leh ang.

Mbappe chungchang
Real Madrid nen nasa taka sawizawm a ni a, mahse a tawpah chuan Paris club tan contract thar a ziak ta zawk. France international hian PSG tan a khelh zawm dawn a, Spanish club nena an boruak vangin PSG fans tih lungawi nen khelh ṭhat a mamawh.

Galtier chuan, "Ani ang player ṭha bik kan nei thei hi a lawmawm, mimala ṭha neih hi team tan a ṭangkai ṭhin. A pawimawh ber erawh team inkhairual tak neih a ni thung, player tinin an theihna ang taka an khelh chhuah nan puih ka tum dawn," a ti.

Kum 23 mi Mbappe hian PSG tan season hmasa khan league goal 28 a khung a, ani aia khung hnem an awm lo. Ṭhiante khung tur siamsak kawngah pawh a thawh hlawk ber a ni bawk, kuminah pawh team tana mi pawimawh bik a ni leh ang.

Ramos a dam
Sergio Ramos hi Real Madrid tana a hun hnuhnungah hliam vangin a buai a, a club thar PSG tan season hmasa kha a khel mumal lo bawk. Kuminah erawh pre season aṭangin a khel ṭha - tlarhnungah Marquinhos leh Presnel Kimpembe te nen an inkawp thei dawn.

Ramos chuan, "Season hmasa kha chu a tawp lamah ka inkhel ve thei chauh a, rilru pawh a hrehawm angreng. Kumin chu a tir aṭangin ṭha taka ka khelh theih ka beisei," tiin beiseina a nei sang a, an lakluh chhan tihhlawhtlin ngei a tum ang.

Real Madrid captain hi kum 36 mi a ni tawh a, a vanglai pel deuh tawh mah se a dam ṭha a nih chuan player ṭha tak a la ni reng. Ligue 1 mai loin Champions League thlengin a tawnhriat neih hi an chhawr ṭangkai thei dawn a ni.

Zanin Inkhel Tur
Strasbourg 08:30 PM Monaco
Clermont 12:30 AM PSG

August 7, Pathianni
Toulouse 04:30 PM Nice
Lille 06:30 PM Auxerre
Angers 06:30 PM Nantes
Montpellier 06:30 PM Troyes
Lens 06:30 PM Brest
Rennes 08:35 PM Lorient
Marseille 12:15 AM Reims