US Open inbuatsaihna zinga mi Silicon Valley Slassic khelh laiah, player langsar Naomi Osaka chu Coco Gauff hneh loin a tla. Nimin zing last 16 inkhel hmuhnawm takah Gauff hi 6-4, 6-4 a chakin quarterfinal a inhlangkai.
Kum 18 mi Gauff hian set khatna la turin break point vawi khat hman ṭangkai a duhtawk a, set hnihnaah pawh American tleirawl hian fal takin hma a hruai thei. 5-1 zeta a san fal hnuah Osaka hian a bei let a, mahse a tawpah a ṭang zo ta chuang lo.
Osaka hian French Open hnua tournament a hmachhawn lehna hmasa ber a ni a, a ṭhat dan berin a la khel chhuak zo lo. Hliam vangin harsatna a nei tawh lo a, harsatna dangin a tlak buak a nih loh chuan US Open atan result ṭha zawk a beisei thei ang.
Gauff erawh Paris khawpuiah khan final a thleng hial - a tan major tournament final hmasa ber a ni, khami ṭum khan champion zo ta chiah lo mah se tawnhriat tam tak a neih belh a, a puitling tawh hle bawk.
American player Gauff chuan, "Set hnihnaah 5-1 a ni a, 40-0 in hma ka hruai bawk, chak turin point khat chiah ka mamawh. Mahse, Osaka kha a beidawng chuang lo reng reng, thui tak chu min pawtthla leh hial.
"Tun ṭuma kan match aṭang hian thil tam tak ka zir chhuak thar leh a ni, point hnuhnung ber hmuh a nih hma chuan inthlahdah leh beidawn hi a thiang lo," tiin a sawi. Quarterfinal-ah chuan Paula Badosa nen an inkhel leh ang.