Shankar-a'n bronze medal a la

India tlangval zuang sang tak Tejaswin Shankar chuan Birmingham Commonwealth Games-ah bronze medal a la. High jump huanga medal la tur hian 2.22m (7 feet 3.36 inches) a sang a zuang a ni.

Shankar hian 2.22m a sang a zawh hnuah 2.28m a zuang leh a, mahse a zuan khum zo ta lo. Australia tlangval Brandon Starc leh New Zealand aiawhtu Hamish Kerr te a tluk ta lo a, pathumnaah a lungawi a ṭul ta zawk.

Inter State Cham-pionship-ah a tel loh avangin Shankar hi CWG khel tur hian a tirah chuan koh a ni lo, mahse inlan tur zinga mi pahnih chu damdawi hman phal loh an hmang tih hmuhchhuah a ni a, hmun ruak a neih theih phah.

Athletic Federation of India (AFI) chuan chawpchilh takin ruahmanna a siam, inelna neih hma ni thum chauh awmah Shankar hian Birmingham a thleng ve chauh, hahchawlhna leh inbuatsaihna duhthusam tak pawh nei lo chungin inelna a hmachhawn.

Kum 23 mi Tejaswin Shankar hian tun hma lamin 2.29m a sang pawh a lo zuang tawh, a tih ṭhat ber ṭum chu ni se gold medal dawng turin theihna a nei tih a chiang a, a kum a la tam loh avangin hmabak êng tak a la nei.