Nottingham nge lian Newcastle?

Zanin dar 7:30 hian St James Park-ah Newcastle-in Nottingham Forest an mikhual dawn a, team pahnih chanchin a ngaihnawm avangin inkhel tur pawh en a châkawm hle.

Newcastle hi kum 2000 chho khan champion an beisei pha a, Premier League history-a striker ṭha ber tia chhal theih Alan Shearer an kawl. Nikum khan Magpies hi Saudi Public Investment Fund-in an lei a, club neitu hausakna hi pound tluklehdingawn 320 anga chhut a ni a, a hnaih bertu Manchester City neitu Sheikh Mansour (£22.9tld) nen a inthlau hle. Mahse, Newcastle hi champion tur chu sawi loh Champions League khel pha tur pawhin rin an hlawh pha lo.

Nottingham hi club ṭha ṭhin an ni a, kum 23 top flight football an khelh loh hnuah an rawn inlar dawn. Forest hi kai thar ni bawk mah se an sulhnu thlir kir chuan European Cup-ah vawi hnih an champion tawh a, champion lai Manchester City pawhin an tih theih loh Europe inelna sang berah nomawi vawi hnih ngawt an chawi tawh.

BBC.com chuan club pahnihah hian tu nge ropui zawk tiin poll an siam a, mipui ngaihdanah chuan Newcastle an ropui zawk. Tun dinhmunah chuan Magpies hi an ropui zawk chiang a, mah se Forest hi dah hniam ngawt a rem lo.