Chhinga Veng leh Chanmari boruak a 'hot'

Vawiin chhun dar 12:00 hian I Day Football-ah Chhinga Veng FC leh Chanmari FC te an inkhel dawn a, team ṭha pahnih an inkhelh dawn avangin inkhel hi en a châkawm hrim hrim a, field pawn boruak vangin a inkhel tur boruak hi a 'hot' lehzual.

Chhinga Veng hian an match hmasa berah Mizoram Police 2-0 in an hneh lo a, Chhingcows hian 1-0 a nih laiin penalty an hlah a, midfield-a an ṭhat tawk loh chu an chak lohna chhanah an ngai. Chanchin ngaihnawm lai tak erawh khelmual pawn chanchin a ni a, Chhinga Veng hian Chanmari biak fel vek tawh Lalengzama Vangchhia chu an chhuhsak.

Lunglei tlangval Zam Zama hi AIFF Elite Academy chhuak a ni a, Bengaluru reserve bakah I League club Churchill Brothers tan a khel tawh. A thuphungin Zam Zama hian Chanmari nen inremna an nei tawh a, mah se ziaka dah a la nih loh avangin Chhingcows-in Ngaizelah inremna an ziahpui.

Hei chauh hi a ni lo, Chhinga Veng leh Chanmari te hi Serchhip striker Lalrinzuala pawh an lo inchuh viau tawh. Chhinga Veng hian Rinzuala hi an chang ta zawk. Khelmual pawn boruak vangin vawiin chhuna inkhel tur hi a ngaihnawm a, Zam Zama hi vawiinah a inlan la rinawm chiah lo mah se khelmual chhung boruak erawh a nun phah khawp ang.

Tlai dar 2:30 hian Mizoram Police FC leh Electric Veng FC te an inkhel dawn. Police hian player ṭha an kawl hnem avangin champion rinkai an ni pha a, Electric Veng erawh champion rinkai an ni pha lo. Chutihrualin Electric Veng hi champion lai an ni a, player naupang che rang an kawl tam avangin Police tan buaina an siam thei thung.