Boxer ropui ṭhin Famechon a thi

WBC world feather-weight champion hlui Johnny Famechon chu kum 77 mi niin a thi a, Australian boxer ropui thih chhan hi tarlan a ni lo.

Famechon hi March 28, 1945 khan Jean-Pierre Famechon tih hming chawiin France khawpui Paris-ah a piang a, mahse, kum nga mi lek a nih laiin Australia-ah an pem a, a hun tawp thlengin Australia-ah hian a awm zui ta a ni.

Amateur boxing-a fight hmachhawn miah loa professional boxing luhchilhtu hian kum 1969 khan Cuban boxer ropui Jose Legra chu point hmangin a hneh a, Albert Hall, London-a a hnehna chan avang hian hriatreng a hlawh zui - a champion hnu lawka Australia a hawin an hmuak ropui hle.

Famechon hian a title hi Japanese boxer ropui Fighting Harada lakah vawi hnih a hum a, mahse, kum 1970 khan Rome khawpuiah Mexican boxer Vicente Saldivar hmachhawnin a title hi a hloh.

Australian boxer hian chak zawk ngeiah inngai mah se chak lo zawkah puan a ni a, inhnek a chawlhsan zui - boxing a chawlhsan hian kum 24 mi lek a ni a, mahse, inhnek tam tawk tawhah a inngaih avangin a vanglai takin a chawl.

Famechon hian vawi 67 fight hmachhawn hmanin vawi 56 a chak a, vawi 20 a khingpui knockout-in vawi nga a tlawm a, a chawlh hian, "Fight tam tak ka hmachhawn tawh a, a tawk tawh e," tiin a career-a a lawm tawk thu a sawi.

Kum 1991 khan Sydney khawpuiah car-in a sut avangin stroke leh thluak lam harsatna a nei a, ni 10 zet engmah hre loa a awm hnuah harhchhuak lehin, pangngai takin a dam leh thei.

Kum 2003 khan Australian National Boxing Hall of Fame-ah lakluh niin, kuminah Member of the Order of Australia (AM) nihna hlan a ni a, Australia mi chawimawina sang palina a ni.

Famechon hi an khua Frankston-ah bronze hmangin a lim dinsak a ni a, Australian boxer zingah Les Darcy leh Lionel Rose tih loha he chawimawina dawng thei a ni a, Australian ho kutpui lar tak Moomba-ah kum 70 khan King of Moomba nihna pek a lo ni tawh bawk - Melbourne mi zinga he dinhmun hauh hmasa ber a ni.