Bundesliga hi playoff ni se a ngaihnawm ang - Klinsmann

Bayern Munich striker hlui Juergen Klinsmann chuan, German rama football inelna sang ber Bundesliga-ah playoff hman ni se a tingaihnawm zual ngeia a rin thu a sawi a, team pakhatin an awpbehna tidanglam theitu a nih a ring bawk.

Tun hnaiah Bayern hian season tin Bundesliga nomawi an chawi tia sawi theih a ni, an elpui club lian dangin player ṭha an neih ve pawh an chhuhsak zel. Germany chauh ni loin European league lian danga player ṭha an lalut reng bawk.

A zawnin season 10 chhung zet Bundesliga title an la thei a, team dang tan hmun awl an siamsak lo. Tuna a lan dan chuan season tharah pawh hian chiang taka an champion leh ngei a rinawm - nizan khan an league match hmasa an khel a ni.

Klinsmann chuan, "Bundesliga tan playoff tih an sawiho tih ka hria a, an rilru tur awm ang chu ka hriatthiampui khawp mai. A nihna tak sawi chuan Bundesliga title hi Bayern Munich tana siam bik emaw tih mai tur a ni tawh.

"Ram dang league angin ngaihnawm zual leh se tih hi ka duhdan a ni a ni a, chuvangin season tluana an inkhelh hnuah a sang zualin playoff khel se tiha ngaihtuahna awm hi kei chuan ka thlawp," a ti.

Kum 58 mi Juergen Klinsmann hian 2011 aṭanga 2016 chhung khan United States football team a enkawl. US-ah chuan infiamna peng hrang hrangah playoff an khel deuh vek. Football inelna Major League Soccer-ah pawh playoff an hmang.

Nizan Inkhel (Results kan hre hman lo)
Eintracht Frankfurt vs Bayern Munich

Zanin Inkhel Tur
Union Berlin 07:00 PM Hertha Berlin
Borussia M'gladbach 07:00 PM Hoffenheim
Wolfsburg 07:00 PM Werder Bremen
Bochum 07:00 PM Mainz
Augsburg 07:00 PM Freiburg
Borussia Dortmund 10:00 PM Bayer Leverkusen

August 7, Pathianni
Stuttgart 07:00 PM RB Leipzig
FC Cologne 09:00 PM Schalke 04