Chelsea-ah Chukwuemeka a chiang ta

Premier League club Chelsea chuan Aston Villa midfielder Carney Chukwuemeka chu pound maktaduai 20-in an lalut fel ta a, Stamford Bridge-ah kum ruk chhung cham turin contract an ziahpui.

Barcelona, AC Milan leh Borussia Dortmund pawhin lakluh an duh nia sawi Chukwuemeka hi Villa chuan contract thar ziahpui an duh a, mahse, thla hmasa khan Villa boss Steven Gerrard chuan a player hi contract thar zawrh reng mah se contract thar a ziah duh loh thu a sawi.

Villa-in Australia-a pre-season tour an neihah pawh English midfielder hi hruai a ni lo a, a tawpah chuan Chelsea a zawm ta. Kum 18 mi midfielder chuan, "A buaithlak takzet a, mahse, ka rilru aṭang hian Chelsea a bo thei lo - a tawpah inremna kan nei thei ta hi ka lawm hle.

"Ka phur tawh takzet a, khelmuala inlan a, player tharte tawn a, Chelsea tan hnehna chang tur leh nomawi chawi tura beih ho ka châk tawh takzet a ni," a ti a, London club a zawm thei chu a lawm hle.

Chelsea chairman Todd Boehly chuan, "Carney hi Europe-a rawlthar ṭhangduang ber pawl a ni a, Stamford Bridge-a a inkhel kan en châk tawh hle. Chelsea-ah ani ang player, naupang theihna nei sang tak, season thar leh nakin zel atana kan lalut thei hi ka lawm hle," a ti.

Eisenstadt, Austria-a Nigerian nupa kara piang, England khua leh tui nihna neitu Chukwuemeka hian season hmasa khan Villa tan inelna hrang hrangah match 21 ngawt a khel ve a, goal hnih khungin assist vawi thum a nei.

UEFA European Under-19 Championship-ah thla hmasa khan England chu champion nomawi a chawipui bawk a, an champion zinkawngah goal thum a khung.

Chelsea hian nipui transfer-ah Raheem Sterling chu Manchester City aṭangin £50mtd thlenga a man sang chho thei turin an lalut a, Napoli aṭanga Kalidou Koulibaly (£34mtd) lalutin, kum 18 mi goalkeeper Gabriel Slonina chu MLS club Chicago Fire aṭangin an lei tawh bawk a, he thuziak i chhiar meuh chuan Brighton & Hove Albion aṭangin Marc Cucurella an lalut fel tawh mai thei bawk.