Forest an la bazar zo lo!

Premier League club zinga nipui transfer-a che na ber pawl, English top flight league kai thar Nottingham Forest boss Steve Cooper chuan an duh ang an la lei kim loh thu a sawi - tun nipui chhungin player 12 ngawt an lei tawh!

Mahse, Cooper chuan, "Player lut leh chhuak an la awm belh nual ka ring. Player lakluh hi thil awlsam a ni lo a, engzat nge kan lakluh leh ang, tih ka sawi thei lo.

"Tuna ka player neih mekteah hian ka rilru ka sawr bing a, mi tam tak nen min sawi zawm mai thei a, dik lo karah a dik a mual mual chu a awm ve mahna. Mahse, tunah chuan ni tin training tura lo kal a, match khelh leh tur atana inbuatsaihte lamah ka rilru ka sawr bing a, chu chu 100% in an phu bawk a ni," a ti.

Forest hian player 12 ngawt an lakluh rualin, Under-23 squad te nena chhiar tel chuan tun nipuiah player 14 ngawt an chhuahtir ve bawk a, kum 23 hnua an khelh leh tur top flight league atan an inpuahchah nasa hle.

Cooper chuan, "Tun season-ah hian eng league pawh khel dawn ila, inthlak danglam hi chu kan tum sa hrim hrim. Premier League kai lo pawh ni ila, chhan tam tak vangin tuna kan chet ang hian kan che tho ang," a ti a, an tana ṭha ber tur anga thutlukna an siam thu a sawi.

Forest hian player langsar zingah Jesse Lingard (free) leh Dean Henderson (loan) chu Manchester United aṭangin an lalut a, Union Berlin striker Taiwo Awoniyia chu club player man to ber ni turin pound maktaduai £17-in an lalut bawk.

European champion vawi hnih ni tawh Nottingham Forest hian zanin dar 7:30-ah an league match hmasa ber an khel dawn a, Newcastle United chu khualmualah an lenchilh ang.