PSG player thar Renato Sanches

French champion Paris St-Germain chuan nipui transfer-a an player lakluh palina ni turin Renato Sanches an lalut a, Paris khawpui club-ah hian kum nga chhung khel turin contract a ziak.

Portuguese midfielder hian a contract a hman zawh chuan kum 2027 thleng chu PSG tan a khel dawn tihna a ni a, Lille aṭanga PSG zawmtu player man hi euro maktaduai 15 bawr vel niin khawthlang media-te chuan an tarlang.

Renato chuan, "Paris khawpui ka lo thleng thei hi ka lawm hle mai. PSG tana contract ka ziah hian thutlukna dik ka siamin ka hria a, he club hmachhawp hi ka tana ṭha ber nia ka hriat avangin PSG hi ka thlang a ni," a ti.

Kum 24 mi midfielder chuan France-a cham chhunzawm chu a tan a ṭhat thu sawi zuiin, "Ligue 1 hi ka tlangnelna sa a nih avangin ka tan chuan France-a cham theih hi a pawimawh takzet a ni," a ti a, Lille tan season thum a khel hman.

Portugal tan vawi 32 inlana goal thum khungtu chuan a Portuguese puite avanga PSG pan hreh lo a nih thu sawi zuiin, "Ka Portuguese pui ṭhenkhat ka zawm thei hi ka lawm a, ka tan chuan thil a awlsam phah sawt dawn a ni.

"Nuno Mendes (left back) leh Danilo Pereira (defensive midfielder) te nen chuan kan inhre sa a, mahse, Vitinha (lakluh thar) nen hi chuan kan la inhre lem lo. PSG ka pan hma hian Nuno ka bia a, he club chanchin duhawm tak tak hi min hrilh a ni," a ti.

Benfica B team aṭanga a professional zinkawng ṭantu Renato Sanches hian Euro 2016-a Portugal a champion pui ṭum khan Euro Young Player of the Tournament chawimawina a la a, Euro khelh hma hian German club Bayern Munich chu euro maktaduai 80 thlenga a man sang chho thei turin a zawm tawh.

Mahse, German club-ah hian beisei a phak lo zui a, match 53 chiah khelhsakin goal hnih a khung a, a kar lakah hian Swansea City-ah loan-a kaltir a ni bawk - kum 2019 khan Lille chu €25mtd a zawmin an player man to ber record a siam.

Lille tan a hming chher zuiin, match 91 a inlansakah goal sarih a khung a, 2020-21 khan rin loh taka Ligue 1 nomawi chawipuiin Trophée des Champions-ah 2021 khan champion nomawi an chawi bawk.

PSG manager thar Christophe Galtier nen Lille-ah hian an thawk dun ṭhin a, French champion an nih ṭum khan Galtier hi an coach a ni - tunah erawh Ligue 1 ni loin Champions League chu an nomawi chawi tura an tuksak chu a ni.

French champion hian nipui transfer-ah Reims striker ṭhangduang Hugo Ekitike (loan), Portuguese midfielder Vitinha (€41.5mtd) leh RB Leipzig defender Nordi Mukiele (€10mtd) an lalut tawh a, season hmasa lama loan-a an hawh Nuno Mendes (€38mtd) chu a nghetin contract an ziahpui tawh bawk.