Eirukna lian chingfel turin CM phût

MNF party chuan thuchhuah siamin, Congress kaihhruai sorkarah eirûkna a hluar hle tih sawiin, mipui hriat lâr eirukna lian tak takte chu chingfel tura chief minister Lal Thanhawla an phût thu an tarlang.

MNF chuan, June 23, 2017-a Serchhip District Research Officer pisa hawnnaah CM Lal Thanhawla'n, 'Eirute hrem duh loah sorkar hi sawi a ni ṭhin. Mahse, thubuaiin Court a thlen hian sorkarin thu a nei tawh lo,' tia a sawi chu mahni mawng hlìmna mai niin an tarlang a; "Thubuai reng reng Court a thlen tawh hnuah sorkarin thuneihna a nei tawh lo tia a sawi hi thu dik a nih rualin, hei vang hi em ni dawn Court thleng hman loa a nau Pu Lal Thanzara thubuai ACB chhui tur, chhan leh vâng awm loa tihtawp a nih, tih hi Pu Hawla kan zawt a ni," an ti.

MNF chuan, CM Lal Thanhawla'n kum 9 chhungin eirukna kaihhnawiah sorkarin mi 1,500 chuang chungah kut a thlak thu a sawi laiin, Zo-Carbon industry hmanga Central Transport Subsidy cheng vbc. tam tak dik lo taka lak te, minister Lal Thanzara'n Sunshine Overseas aṭanga chanvo 21% a neih te, auction/tender pawh awm loa Dihmunzawla PHE building hlui cheng nuai 63 chuanga ṭhiah te, lottery sum vbc. sing chuang chingpennaahte hrem an awm lo tih an tarlang.

Chief Minister leh a nau leh minister ṭhen-khatte chu an thuneihna hmanga inhum tlatah puhin MNF chuan, "An hnen aṭang hian rorelna dik beisei tur a awm lo. Rorelna dik chu luipui angin a luang hek lo tih hi MNF ngaihdan a ni," an ti.

Sorkar hnathawk mi 1,500 chuang eirûkna vanga hrem an ni chu Congress sorkarah eirûkna a hluarzia tichiangtu a nih thu sawiin MNF chuan, mipui hriat lâr eirukna lian tak takte pawh chingfel thuai turin sorkar an phût a ni.