Confederations Cup Ronaldo hoin semifinal-ah Portugal an lut

Europe champion Portugal-in Confederations Cup semi­final lut turin harsatna an tawk lo - Inrinni zan khan New Zealand chu 4-0 zetin an sawp a, Cristiano Ronaldo chuan penalty aṭangin goal khat a khung.

Kum 2001-a South Korea hnuah Confederations Cup inelna thlengtuin group stage an paltlang lo - Russia-in group match hmasa berah New Zealand hnehin bul ṭan mah se an match hnuhnung pahnihah chak hmel an hmu leh tawh lo a, Inrinni zan khan Mexico chu 2-1 a ngam loin khawmualpui champion inelna an mangṭha.

Nizanah Group B-in an match hnuhnung ber an khel ve chauh a, Chile leh Australia inhmachhawnin Germany leh Cameroon an intum bawk a, an result kan hre hman lo. Portugal hian semifinal-ah Group B pahnihna an tum ang a, Mexico-in hmahruaitu an tum thung ang.

Europe champion
Portugal-in New Zealand an hmachhawn hmain match hnihah point li an hmu tawh a, All Whites an hmachhawn hma hauh hian semifinal lut tawh 'tlukah' ngaih an ni. Inrinni zan khan New Zealand leh Portugal an inhmachhawn ta ngei a, beisei ang ngeiin Ronaldo leh a hoten 'Europe champion' an nih chhan an pholang.

Fernando Santos-a'n inelna ṭan a nih hmain a naute a siksawi nasat ṭhin tur thu a sawi avangin New Zealand lakah Ronaldo chu bench-ah a dah beisei ni mah se Real Madrid forward hian inkhel bul a ṭan a, a chhanletna chu goal a ni. Manchester United nena sawizawm hlawh mek forward hian minute 33-na lekah penalty hmangin goal hmahruai a khung a, Manchester City-in pound maktaduai 43-a a lakluh thar Bernardo Silva, AC Milan striker thar Andre Silva leh Nani-ten goal khat ṭheuh khung ve bawkin Portugal an chak chiang.

Ronaldo-a inringtawk
Kum 32-a upa Ronaldo-a'n Portugal tan goal a khung a, ram tan vawi 142 inlana goal 75 a khungna chiah a ni - Europe-ah ram tana goal khung hnem lama a tluk loh awmchhun chu goal 84 khungtu Hungary legend Ferenc Puskas a ni a, tun season-ah ram leh club tana goal a khung zat chu 56 a ni.

Ronaldo chuan, "Goal hma­hruai ka khung a, semifinal kan luh theihna tur atana he team tana tha ka thawhve hi ka lawm takzet a ni. Kan khel ṭha em em a, hnehna chan ngei duha kan khelh avangin first half-ah khan kan duh ang result chu kan nei fel der tawh. Semifinal-ah Germany emaw Chile kan hmachhawn dawn a, team ṭha tak ni ve ve mah se inrintawkna nen kan hmachhawn ang," a ti.

Pepe tel lohna Portugal
Portugal defender Pepe-a'n tun tournament-a a yellow card pahnihna a hmuh avangin semifinal a khel ve thei dawn lo a, second half-a ngalrek hliam vanga lakchhuah Bernardo Silva dinhmun a chiang lo bawk - Portugal tan thu hriat nuam a ni hauh lo ang.

Hetihlai hian Portugal boss Santos chuan, "Semifinal-a kan khingpui tur ka ngaihtuah lo a, Chile leh Germany hi team ṭha tak ve ve an ni. Eng team pawh tum dawn ila, ṭha taka inbuatsaih hi kan tih tur chu a ni," tiin semifinal a thlir lawk a, New Zealand lakah a nauten a thupek an zawm avangin ṭha taka an khelhchhuah thu a sawi bawk - All Whites nena an inkhel hi Portugal midfielder Joao Moutinho tan ram tana a match 100 inlanna chiah a ni bawk.

Russia an tlawm
Confederations Cup thleng­tu Russia-in semifinal lut tur­in chak ngei an mamawh tih an hria a, inkhel ṭantir aṭangin Mexico an nawr nghal. Inelna thlengtu tan hian Fedor Smolov-a'n goal post a pet per dawp hnuah Russia tan Alexander Samedov chuan minute 25-naah tawih zetin an hmahruaina goal a khung.

Mikhualna ramah Mexico an zam duh lo, goal an chhuah aṭanga minute nga hnu lawkah Nestor Araujo chuan an si phurh sutna goal a tauh lut. Russia an talbuai chhunzawm a, Mexico an phur tawlh tawlh. Minute 52-naah Hirving Lozano chuan hmahruaina goal a khung a, Russia goal luh chhanah goalkeeper Igor Akinfeev leh defender Viktor Vasin puh theih an ni. Russia tan Chelsea midfielder hlui Yuri Zhirkov chu minute 68-naah a yellow card pahnihna avangin hnawhchhuah a ni a, Russia tan tho turin 'tha' a awm tawh lo.

Nomawi chawi duh Chicharito
Mexico striker Javier Her­nan­dez chuan, "Mimal pakhat hming lam ringawt chu thil dik a ni lo ang. Goal khungtu ringawt hi hna thawk ṭha a ni lo a, khingpuite chetsual vanga tun hun thleng pawh kan ni chuang lo. Kan vaiin kan thawkrim em em a, hnehna chan ngei tumin theihtawp kan chhuah vek a ni," tiin team hnathawh vanga semifinal lut an nih thu a sawi.

Chicharito tia hriat lar striker chuan final thlir nghalin, "Chile emaw Germany kan tum dawn a, a tu zawk pawh hmachhawn ila team ṭha tak ve ve an ni. Keinin kan duh ber chu kan hmaa ding chu tupawh nise, champion nomawi chawi kan duh. Final luh a, hnehna chan hi kan chak takzet a ni," a ti a, an ram tana lawmna thlen a duh.

Theihtawp chhuahtu Mexico
Mexico coach Juan Carlos Osorio chuan, "Team ṭha tak kan hmachhawn dawn tih kan hria a, inelna thlengtu an nih avangin Russia khan tlawm an duh lo lehzual a, ka ngaihdanah chuan kan khel ṭha takzet a ni," a ti.

Osorio chuan sawi chhun­zawmin, "Mexican player-te hi chuan an theihna zawng zawng pein an khel ṭhin a, a tawp thlengin theihtawp chhuahin an khel tawp mai a ni. Tumruhna, chakna leh kan thinlung zawng zawngin kan khel a, vawiina hnehna kan chan hi Mexican football tan a ṭangkai dawn a ni," tiin a hlim hle.