Arbeloa a chawl ta

Real Madrid defender hlui Alvaro Arbeloa chuan inkhelh a chawlhsan ta. Kum 34-a upa defender hian sea­son hmasa ṭan dawn khan Real Madrid chhuah­sanin West Ham a pan a, mahse Ham­mers tan hian manager Slaven Bilic nen an inhmuhthiam loh avangin Pre­mier League match thum bak a khel lo.

Spain tana vawi 56 inlan thei defender hian 2006-07 season ṭan dawn khan amah chher liantu Real Madrid chhuahsanin Liverpool a zawm a, Reds tan season thum a khelh chhungin match 98 a inlan a, nomawi chawipui nei loin 2009-ah khan Santiago Bernabeu lamah hian a kir.

Arbeloa hi Spain-a a kir hnuah Real tan season sarih chhung a khel hman - La Liga (1), Spanish Cup (2), Spanish Super Cup (1), Champions League (2), FIFA Club World Cup (1) leh UEFA Super Cup (1) chawipuiin Spain-a a season tawp ber tih loh hi chu Real-ah player pawimawh pawl a ni.

FIFA World Cup 2010-a Spain an champion ṭum pawhin Arbeloa hi a tel a, kum 2008 leh 2012 Euro-ah khan an ram hi a champion pui bawk.

Deportivo tana season khat lo khel tawh bawk defender chuan, "Tunah chuan mangṭha ka tih a ṭul ve ta a ni," tiin a infiamna ngainat a mangṭha a hun ve tawh thu a sawi a, hetihrual hian Real-a kir leh chu thil theih tak a nih tur thu a sawi lang.

Arbeloa chuan, "Madrid hi ka nun bul inṭanna club a ni a, mahse hna dil hma­satu nih erawh ka tum lo. Min mamawhna an nei a nih erawh chuan engtiklai pawhin ka inring a ni," a ti a, Real-ah player ni kher loa kir leh a hreh lo.