NE champion Mizoram

CAPF Under 19 Tournament North East Zone final-ah Mizoram mipa team-in Inrinni khan Manipur 2-1 a hnehin an champion. Goal hnih hi Khawzawl tlangval Vanlallawma khung a ni.

Jawaharlal Nehru Sta­dium, Shillong-a inelna neihah hian Mizoram team hi Lalsangzuala Hmar leh Lalremruata ten an enkawl a. Hmeichhe inelnaah Mizoramin semifinal-ah Manipur 0-6 in an hneh lo a, mipa team-in phuba an laksak ta a ni.

Mizoram hmeichhe team hian Zirtawpnia pathumna inchuhna neih­ah Nagaland 3-2 in an hneh.

Mipa inelnaah Mizo­ram hian group stage-a an match hmasa berah Arunachal Pradesh chu goal awm loin an draw a, knockout stage lut turin Tripura 1-0 in an hneh a, goal awm chhun hi Vanlallawma khung a ni.

Semifinal-ah Mizo­ramin goal khat thoin Meghalaya an hneh a, Siaha rawlthar Laldin­puia'n chakna goal leh goal awmchhun a khung.

Final-ah Vanlallawma bawk a che ṭha a, 2017 NECS Cup top scorer hian goal hnih a khung a, tun inelnaah hian goal thum a khung a ni.

Mizoram team coach Remruata chuan, "Kan vannei a ni. Manipur hi an ṭha a, an khelh chhonaah pawh an khel ṭha. I League khel tur Neroca player an awm nual a, kan naute erawh MPL khel phak pawh an la ni mang lo deuh vek an ni a, ka chhuang khawp mai," a ti.