Ticket zawrh chhuah hun June 28

Football Players Association of India (FPAI) leh Mizoram Football Association ṭangkawpin July 1, 2017-a Rajiv Gandhi Stadium-a exhibition match an buatsaih tur chu June 28 aṭangin ticket zawrh chhuah ṭan a ni dawn. Inkhel en man hi Rs 100 leh Rs 200 a ni ang.

Rajiv Gandhi Stadium chung lam zawng hi Rs 200/- man ticket leite ṭhutna a ni a, a hnuai lam hi Rs 100/- man leite ṭhutna a ni thung ang.

Ticket hi Aizawl khawpui hmun hrang hrangah zawrh chhuah a ni dawn a, ticket chan loh a awm theih avangin en ngei tumte tan chuan inrinlawk a ṭul dawn a ni.

He inkhel halftime lai hian Indian football-a chawi­mawi­na sem chhuah zinga ngaih hlut ber pakhat, FPAI Awards chu sem a ni ang.

Inkhel entute hian sawm bikte chauhin an chhim theih ṭhin FPAI Awards semna hun hi an chhim thei dawn a, ṭum dangah chuan FPAI Awards hi sawm bikte pualin in chhungah sem thin a ni.

FPAI leh MFA te chuan exhibition match aṭanga an sum hmuh chu tun hnaia Mizorama chhiat tawkte ṭanpui nan an pe ang.