Ṭanpui ngaite puihna tur a nihna hian Ka phurna a belhchhah - Mama

Football Players Association of India XI leh Mizoram XI ten July 1, 2017 hian Rajiv Gandhi Stadium, Aizawlah exhibition match an khel dawn a, tualchhung football ngaina tan inkhel hmuhnawm thlir turin ni sarih chiah nghah a ngai tawh - inkhel en man hi Rs 100 leh Rs 200 man a ni ang.

Mizo footballer-te tana sulsutu S. Malsawmtluanga chuan, "India rama footballer ṭha, hlawhtlinna chang tawh leh kan ngaihsan ho nena khelmual khata kan awm tur hi a lawmawm ka ti a, a châkawm tawh hlein ka hria. Pawisa pung khawm angte ṭanpui ngaite ṭanpuina atana an hmang tur hian ka phurna a belhchhah bawk," tiin exhibition match chungchang a sawi.

Mama hi Mizo zinga professio­nal footballer hmasa a ni a; India captain Sunil Chhetri chuan, "Mizo footballer ka khelhpui tawh zinga ṭha ber chu Mama a ni a, ani hi chu a special a ni," tiin Vanglaini a lo hrilh tawh a, hei hian Mizo legend hi a danglam tih a sawifiah.

East Bengal leh Mohun Ba­gan midfielder hlui Mama chuan, "Exhibition match khel tur chuan ka fitness a ṭha tawk a, amaherawhchu inelna sang hmachhawn tur chuan tun aia fitness tih ṭhat erawh ka mamawh ang," tiin a sawi a, season liam ta khan Southern Samity tan I League second division a khel a ni.

A number hak ṭhin no. 28 chungchang sawi chhunzawmin Mama chuan, "Number 28 hi ka ngaina hrim hrim a, professional football ka khelh tirh aṭangin he number hi ka ha tawh a ni. Club-ah pawh hian hlawh chungchang kan sawi baka ka sawi ṭhin chu number 28 hi a ni a, Mohun Bagan-a season khat ka khelh ṭum tih lohah chuan no. 28 hi ka ha char char a ni," tiin a ngaihhlut thu a sawi. Exhibition match-ah pawh hian Mama hian Mizoram XI tan jersey no. 28 a ha ang.

CYMA Football 2017-ah Mama hi Chhinga Veng tan player pawimawh a ni a, semifinal an luhna kawngah player ṭangkai a la ni. He inelna hi Lammuala S. Malsawmtluanga Stand an siam hnua Mama'n competitive match a khelhna hmasa ber a ni.

TFA Academy chhuak Mama chuan, "Mahni hming chuanna stand awmna hmuna inkhelh chuan tlangnel a awl a, rilruah neitu nihna a lian hle. Ka hming chuanna stand a awm hi ka lawm takzet a, chutihrualin vawm pawhna hnu a awm erawh a hrehawm ka ti. Thuneitu lamin siam ṭha thei se, mahni pawisaa siam ṭhat pawh ka duh a ni," tiin a hming chuanna stand chungchang a sawi.