Chen Long hnehin Srikanth a champion
India tlangval Kidambi Srikanth chuan Olympic champion lai Chen Long chu straight game-a hnehin Australia Open Super Series nomawi a chawi a, Indian shuttler hian Chinese shuttler hi a vawi khat hnehna a ni. Nimin khan Srikanth hian China tlangval Long lakah hian 22-20, 21-16 in hnehna a chang a, Super Series title vawi li a lakna chiah a ni.
World number 11 Srikanth hi tun hnaiah a khel ṭha tluang hle. Australia Open hma hian June 18 khan Indonesian Open Super Series Premier nomawi a chawi tawh a, April thla khan Singapore Open-ah final a thleng bawk. Heng inelna lian pathumah hian world number 1 nilai Son Wan Ho leh Chinese shuttler langsar Shi Yuqi te chu vawi hnih ve ve a hneh thei a ni.
Tun hmain mipa player zingah mi pali chiah a zawna Super Series finals vawi thum khel thei an la awm, tunah chuan Hyderabad tlangval hi a palina a ni ta! He sulhnu ropui hnutchhiah tura a hneh Chen Long hi Rio Olympic-ah khan gold medallist a ni a, Srikanth hian vawi ruk a hmachhawn tawhah a vawi khat nan hnehna a chang.
Kumin Australian Open Super Series-ah hian Indian shuttler dang - Sai Praneeth, PV Sindhu leh Saina Nehwal te pawhin quarterfinal an thleng vek a, mipa champion Srikanth nen hian an vaiin Gopichand Badminton Academy chhuak vek an ni. Tun hnaia chief national coach Pullela Gopichand hnuaia Indian shuttler-te chet ṭhatna hi Badminton Association of India (BAI) tan hmasawnna duhawm a ni.
Indian mipa shuttler zinga Super Series title la zawn thei hmasa ber Srikanth hi BAI chuan nuai 5 an pek tur thu an puang nghal a, India prime minister Narendra Modi pawhin chhuanawm a tih thu leh khawvel hmuha India chawimawitu a nih thu a sawi ve bawk.
India ram badminton-a thuneitu sang ber BAI chuan, "Srikanth hlawhtlinna hi Indian badminton tan chuan hnuhma duhawm bik a ni a, kan chhuangin kan lawmpui takzet. Ani hian ram puma badmintion ngainatute hlimna min pe a ni," tiin thuchhuah an siam.
Nikum Rio Olympic-ah khan hmeichhe singles-ah PV Sindhu-i'n silver medal lain Indian badminton chu bung thar a kai pui a. Brazil-a infiammite khawmpui lianah hian Srikanth pawh hi a inlan, round hmasa lamah Lino Munoz leh Henri Hurskainen te hnehin last 16 a inhlang kai a, world number 5 Jan O. Jorgensen hnehin quarterfinal a lut, mah se Chinese legend Lin Dan hneh loin a zinkawng a tawp.
Olympic-ah hian Srikanth hi a kerek a hliam a, hei vang hian a hnu lamah pawh beisei angin a khel zui thei lo. Kuminah a hliam damin court chhungah harsatna nei loin a inlan leh tawh a, Singapore Open-ah pahnihna niin Indonesia leh Australia-ah te champion ve ve a ni.