Jeho leh Alberto hming a mawi zel

Table Tennis Federation of India (TTFI) hnuaia inelna lian pakhat 11Even Sports National Ranking (Central Zone) Table Tennis Championship neih zawh taka Sub Junior Boys category-ah Lunglei naupang Jeho Him­na­kulhpuingheta chuan silver medal lain Mission Veng naupang Alberto LR Ruata chuan bronze medal a la ve bawk.

Inrinni khan Abhay Prashad In­door Stadium-ah inelna hi zawh niin Jeho-a hian final-ah game hmasa ber a lak hnuin Delhi naupang Payas Jain chu 8-11, 11-7, 23-21, 11-9, 11-8 in a hneh lo. Lunglei Salem Veng naupang hian semifinal-ah Dev Shroff chu 4-1 a sawpin final a inhlangkai, nomawi inchuhna inkhelah erawh a vanduai zawkah a ṭang ta a ni.

Petroleum Sports Promotion Board (PSPB) lamah Jeho-a zirpui Alberto pawh tun ṭumah hian a khel chhe lo, semifinal-ah Payas Jain hi 11-2, 11-3, 8-11, 9-11, 12-10 in ngam lo mah se bronze medal a vaw chhuak ta tho.

India sub junior number 1 Jeho-a hian April thla khan Belgium Junior and Cadet Open 2017-ah India aiawha khelin bronze medal a la tawh a, nikum December thla khan Sub-Junior National TT Championship-ah a lo champion tawh bawk.

India president Pranab Mukherjee hnen aṭanga National Child Award for exceptional Achievement 2015 dawng tawhtu Jeho-a chuan, "Ṭawng­-ṭai puina ka dawng hnem a, pakhatna ni chiah lo mah ila ka thlen chinah ka lawm. Hmasawnna tur ka la ngah hle a, a sang thei ang ber thleng thei turin ka bei chhunzawm zel ang," tiin Vanglaini a hrilh.

Table Tennis-ah chuan India hi zone panga - East Zone, North Zone, Central Zone, Indore Zone leh South Zone-ah te ṭhen hran a ni a, Mizoram Table Tennis Assocition (MTTA) chuan nikum November thla khan a vawi khat nan East Zone hi a lo thleng tawh.

Jeho leh Alberto te ṭhiandun hi nikum khan 11Even Sports 78th Cadet and Sub-Junior National Table Tennis Championship-a doubles inelnaah an lo ṭangdun tawh a, final-ah West Bengal duo Tamal Ballav leh Abir Roy te chu 4-1 a hnehin champion nomawi an chawi tawh bawk a ni.