Thangboi Singto-a'n Kerala Blasters a zawm

Indian Super League 2016 finalist Kerala Blasters chuan Shillong Lajong coach hlui Thangboi Singto chu assistant coach ni turin an lalut a, kum 43-a upa manager hian director of youth football dinhmun a luah tel bawk ang.

Manipur chhuak Thangboi hian Kerala Blasters a zawm hma hian Shillong Lajong-ah kum li chhung hun a hmang a, season hman zawh takah khan Meghalaya club hi I League-ah pangana dinhmun a luahpui thei a ni.

Kerala Blasters hian Federation Cup khelh lai khan Shillong Lajong coach hi indawrna an lo neihpui tawh a, tun hnaia Khalid Jamil chantu Aizawl FC nen pawh sawizawm hlawh hman viau mah se ISL lama kal a thlang ta zawk.

Thangboi hian player naupang zawk enkawl a thiamna chu a hmingṭhatpui hle a, Mizo rawlthar Isaac Vanmalsawma leh Samuel Lalmuanpuia bakah Nim Dorjee Tamang-te chu Shillong Lajong-a a chher chhuah player langsar an ni.

Kerala club hian season hmasaah khan Steve Coppell enkawlna hnuaiah an khel a, Manchester City manager hlui hi an hnena cham chhunzawm tura inbiakna neihpui mekin Thangboi nen hian an inkawp ngei a rinawm hle.