MFA Super Cup - June 28 thleng entry fee pek theih

Mizoram Football Association 2017-18 season bul ṭanna tur, Mizoram chhunga football club eng pawh tel theihna, lawmman cheng nuai 4.5 semna tur, Lalbiakliana Memorial Mizoram Football Association Super Cup 2017 chu July 3, 2017 aṭangin Aizawlah khelh ṭan a ni dawn.

Entry Fee Rs 500 chu June 28, 2017 thleng, MFA Office, City Park-ah a pek theih ang. Lalbiakliana Memorial MFA Super Cup-ah hian lawmmana pawisa sem zat tur hi Rs 4,50,000 a ni ang a, Mizorama knock out competition-a pawisa tamna ber a ni ang.

MFA/District FA leh Zone FA hnuaia affiliated club tu pawh tel theih a ni ang a; team 32-in lawmman an dawng thei ang. Tun ṭumah hian MPL club pawh seeded an ni dawn lo a, first round aṭangin an khel ṭan ang.

MFA Super Cup hi a ṭantirh lamah chuan MPL champion leh I Day Football/MFA Cup champion te an inel mai ṭhin. Chanmari FC-in Super Cup nomawi kum zawnin an chawi nghal a, kum thumna champion chu Bethlehem Vengthlang FC an ni.

Kum lina aṭangin kalphung thar a piang a, match khat chauh a ni tawh lo. District FA hnuaia club zawng zawng tan tel theih a ni. MPL club pariatte chu round of 16 aṭangin an khel ṭan a, club dang zawng chu DFA hnuaia first division emaw third division emaw pawh ni se first round aṭang vekin bul an ṭan.

District FA hnuaia affiliated club 58 chu group pariatah ṭhenhran an ni a, MPL club pariat nen an vaia team tel zat chu 66 an ni. Final-ah I League club Aizawl FC-in B. Zoramthara goal awmchhun hmangin Chanmari FC 1-0 in an hneh a, inelna kalhmang thlak danglam hnua champion hmasa ber leh nomawi kawltu an ni.

Lawmman
Champion Rs 2,00,000
Runners up Rs 80,000
Semi Finalists Rs 20,000
Quarter Finalists Rs 8,000
Round of 16 Rs 4,500
Round of 32 Rs 2,500
Fair Play Rs 10,000
Mimal Lawmman
Best Goalkeeper Rs 3,000
Best Defender Rs 3,000
Best Midfielder Rs 3,000
Best Forward Rs 3,000