AFC-ah Mizoram keeper

Aizawl FC-in season thar atan I League-a an goalkeeper Albino Gomes an chelh thei lo a, MPL-a an chhawr rim Zothanmawia'n Chhinga Veng a pan bawk. I League champion hian an keeper thlak nan Santosh Trophy-a Mizoram keeper Lalremruata an lalut.

ITI Veng tlangval hi SYS FC aṭanga inzir chhuak niin season liam ta khan Shillong club Royal Wahingdoh tan a khel a, Mizoram keeper neih ṭhat zinga mi a ni.

Aizawl FC hian I League an cham­pion-na kawnga mi pawimawh an chan nual tawh a, chung zingah chuan coach Khalid Jamil, defender Eze Kingsley, midfielder Mahmoud Al Amna, winger Brandon VL Remdika leh defender Lalramchullova te chu player langsar an ni a. Season tharah hian coach thar nen team thar an din dawn a ni.

AFC technical director Hming­thansanga chuan, "AFC Champions League kan khelh dawn avangin pro licence nei coach kher kan mamawh a, chuvangin Mizo coach chu kan lalut lo ang. Season thara I League leh MPL khelh hun a la chiang lo a, hei vang hian coach tur hi kan la tichiang thei lo a, biak erawh kan nei tawh a ni," tiin Vanglaini a hrilh.

MPL hnuhnung berah Aizawl FC hi semifinal-ah champion zui ta Chan­mari FC lakah an mualpho a, tualchhung football-a chungnung turin insiamṭhat an mamawh hle. Mizo club hian I League champion-na tura Shillong Lajong lama goal khungtu William Lalnunfela an chelh tawh a, midfielder H. Lalbiakthanga leh defender Hmingthanmawia (Valpuia) te contract an ziahpui tawh bawk.

Valpuia hi AFC Academy chhuak a ni a, season liam ta khan player inhliam nasat avangin season tawp lamah senior team tan a inlan tawh a. Ramhlun North tlangval Valpuia hi kumina National Junior C'ship-a Mizoramin pahnihna nih theihna kawngah player pawimawh a ni a, best player atan thlan a ni.