Euro U21 semifinal-ah Germany leh England
UEFA European Under 21 Championship-ah Inrinni zan khan Germany-in Italy hneh lo mah se vannei takin knockout stage an lut a, Poland 3-0 a sawptu England nen semifinal-ah an inhmachhawn ang. Semifinal pakhat zawkah Spain leh Italy an inkhel dawn a, kum bithliah inelnaah football thiam ram pali chiah an dam tawh avangin ngaihven a hlawh sawt.
UEFA Under 21 Euro 2017 semifinal hi June 27, Thawhlehni zanah khelh a ni dawn a, final hi June 30, Zirtawpni zana khelh tur a ni a. Inelnaah hian kum 1994 leh a hnu lama piang chin tan tel theih a ni.
Inelna kalhmang
Euro U21 C'ship-ah hian inelna thlengtu Poland chu tling sa an ni a, team dang 52-in hmunruak 11 an inchuh. Group A-ah England, Slovakia, Sweden leh Poland te an awm a, Group B-ah Spain, Portugal, Serbia leh Macedonia te awmin Group B-ah Italy, Germany, Denmark leh Czech Republic te an awm thung.
Group pathum aṭang hian a sang ber ṭheuhin semifinal an lut a, hmunruak pakhat hi group tina pahnihna aṭanga tiṭha ber tan zuah a ni.
England an tho
June 11 khan England-in Under 20 World Cup final-ah Venezuela 1-0 a hnehin nomawi an chawi a, senior team-a beisei pha lo ram hi kum bithliah inelnaah erawh beisei phak bakin an che ṭha. UEFA Under 21 Euro 2017-ah pawh England-in semifinal an thleng a, hei hi a awlsam lo.
Group A-ah England hian an match hmasa berah Sweden goal awm loin an draw a, match hnihnaah Slovakia 2-1 in an hneh hram. Match hnuhnung berah England-in chak an mamawh a, June 22 zan khan Poland 3-0 in an sawp.
England team-ah hian Southampton forward James Ward-Prowse chu captain a ni a, Everton-in British goalkeeper manto ber tura Sunderland aṭanga an lakluh thar Jordan Pickford chu si ban nghaktu a ni. Under 21 team-ah hian Arsenal defender Calum Chambers, Everton defender Mason Holgate leh Southampton forward Nathan Redmond te an awm bawk a, Premier League-a tawnhriat nei ṭha an nih hlawm avangin champion thei team a ni.
Spain an thiam
Group B hmahruaitu Spain-in an khingpui Macedonia (5-0), Portugal (3-1) leh Serbia (1-0) in an hneh vek. Spain U21 hi Euro U21-ah vawi li an champion tawh a, kum 2011 leh 2013 khan kum zawnin nomawi an chawi.
Tun ṭumah hian senior level-a player langsar ni pha Hector Bellerin, Saul Niguez, Denis Suarez leh Gerard Deulofeu te an awm a, an player-te hi club liana khel vek an nih avangin champion rinkai an ni.
Germany hnehtu Italy
June 24, Inrinni zan khan Italy leh Germany ten Group C aṭanga semifinal lut tur an zawng a, Azzurrini (Little Blues)-in Fiorentina tana jersey no. 10 ha pha tawh Federico Bernardeschi goal hmangin hnehna an chang.
Italy hian an match hmasa berah Denmark hnehin Czech Republic hneh lo zui mah se Germany aia an head to head a ṭhat zawk avangin group hmahruaitu nichungin semifinal an lut. Italy-ah hian AC Milan keeper Gianluigi Donnarumma an kawl a, an striker Domenico Berardi hian Sassuolo tan goal 59 khung tawhin heng zinga goal 43 hi Serie A inelnaa a khung a ni.
Pahnihna zinga che ṭha ber Germany hi Italy lakah vanduai mah se team ṭha an ni a, Czech Republic (2-0) leh Denmark (3-0) an hneh ṭumin goal nga an khung a, goal an chhuah lo. Amaherawhchu FIFA Confederations Cup-ah Under 21-a tel thei tur Niklas Sule, Matthias Ginter, Leon Goretzka, Julian Brandt leh Timo Werner te an inlan avangin an ṭhat theih dan ber turin an khel lo.