Mohun Bagan-in Kingsley an lalut

Aizawl FC defender Eze Kingsley chuan Kolkata club Mohun Bagan a zawm. Nigerian defender hian season hmasa I League-a Aizawl FC an champion-na kawngah a thawhhlawk hle a, match khat hrem vangin a khel lo tih loh chu league match zawng zawng a khel kim vek a ni.

Kingsley tan season hmasa kha India rama league sang bera a inlan vawi khatna ni mah se Kolkata-ah erawh a mikhual lo hle a, Calcutta Football League club Police AC, United Sports Club leh Peerless tan pawha lo khel tawhin Mohun Bagan a talbuai tur a ni lo.

Green and Maroon Brigade (Bagan sawina) hian East Bengal striker hlui Ranti Martins chu indawrna an neihpui mek nia sawi a ni bawk. I League-a goal khung hnem ber dinhmun luahtu Ranti hian season hmasa khan Malaysian club Pulau Pinang a zawm a, beisei anga che ṭha loin match 10 a inlanah goal li a khung sak.

USA-a division hniam lam club Super Green Eagles FC tana khel mek Ranti Martins chuan, "Mohun Bagan nen indawrna kan nei mek a, January-ah India ka pan a nih pawhin a mak lo ang," a ti a, I League-a match 203 a khelha goal 163 khung thei striker hian Maryland club-ah hian December thleng cham turin contract a la nei mek.