Olic-a'n football khel zel dawn?

Bayern Munich striker hlui Ivica Olic chuan football a chawlhsan tur nia German newspaper Bild-in an tarlan chu thu belhchian dawl lo a nih thu a sawi! Croatia international hi kum 37 mi a ni tawh a, an ram tan match 104 khel hmanin 2002 leh 2014 World Cup-ah te khan goal a khung.

Olic hian an ram club Marsonia-ah bul a ṭan hnuah CSKA Moscow a zawm a, Russia-ah hian Russian Premier League nomawi pathum bakah 2005 UEFA Cup a chawi.

Russia-a hlawhtlinna a chan hnuah kum 2007 khan Bundesliga a pan a, Hamburger SV tana goal 29 a khung hnuin Bayern Munich a zawm leh. Allianz Arena-ah hian league leh German Cup vawi hnih ve ve a chawi bakah Champions League final vawi hnih a khel a, a chak lo zawkah anṭang ve thung a ni.

German newspaper Bild chuan, "Tunah chuan ka ball boot khai a hun ve ta. Ka inkhelh hun chhungin hlawhtlinna tam tak ka tawng a, tunah chuan buaina leh harsatna nei loin football ka chhuahsan a hun ve ta a ni," tiin Olic thusawi an ziak chhawng.

Mahse, Olic chuan, "Ka club tana ka match hnuhnung ber ka khel a ni mai a, season hmasa tawp ang khan sawmna dang ka hmu a nih chuan ka inkhelh chhunzawm leh ang," a ti.

Olic hian a inkhelh hun chhungin club hrang hrang 10 tan a inlan tawh a, inelna hrang hrangah match 594 khelin goal 231 a khung. Season liam ta khan 2. Bundesliga club 1860 Munich tan a khel a, a club hi German club inelna sang ber dawtah a inhamtan pui zo lo.