Remsiami leh India tan Bronze medal

Commonwealth Games 2022-ah Mizo nula Lalremsiami Hmar telna India hmeichhe hockey team chuan bronze medal an vaw chhuak. India hian New Zealand chu penalty-ah 2-1 a hnehin pathumna dinhmun hi an luah.

Nimin tlai bronze medal inchuhna inkhelah India tan Salima Tete chuan goal a khung a, 1-0 in hun rei tak chhung hma an hruai. India hian an chakpui mai dawn emaw tih hnuah New Zealand lamin an sut a, 1-1 nia hun tawpin penalty hmanga chak zawk zawnnaah India an vannei ta zawk.

British ram awpna hnuaia awm tawhte inelna Commonwealth Games hi zaninah khar a ni dawn a, vawiin hian inelna tur a la awm nual. Nimin tlai thleng khan India chuan gold medal 13 a la tawh a, silver medal 11 leh bronze medal 16 nen pangana dinhmun an luah mek.

Gold medal 58 la tawhtu Australia chu hmahruaitu niin, an hnuaiah hian England, Canada, New Zealand leh India te an awm.

India an chak
Semifinal-ah India hian Australia an ngam lo, penalty-ah vanduai zawk an ni. New Zealand hi England laka chak lo an ni thung, ram pahnih hian medal hum haw ngei an tum avangin inkhel a hmunawm a, goal khung erawh an harsat.

India tan Salima Tete-i'n third quarter-ah goal a khung hlauh, a hnu lamah New Zealand hian nawr viau mah se goal an khung thei lo. India lamin counter attack aṭangin remchang an hmuh theih phah zauh zauh thung.

Quarter hnuhnung ber an khel a, India tan Navneet Kaur-i'n amah vengtu bum tlangin keeper chauh a hmachawn hman, mahse mawi zeta khung a tumna lamah goal zawnah a vaw lo, India lamin chak an la nemnghet thei mai bik lo.

Hun tawp nan second 30 bawr chauh a awm tawh - India hian penalty corner an chawi, penalty corner aṭang hian goal chhuah lo mah se ball kal zel vangin penalty an chawi; Olivia Merry chuan chiang zeta khungin si phurh a sut.

Penalty hmanga chak zawk zawn nghal niin - India tan Sangita Kumari leh Navneet ten an khung laiin, New Zealand lamah Megan Hull bakin a khung lo. India goalkeeper Savita Punia a che ṭha takzet.

Mizo nula
India hmeichhe hockey team tan Lalremsiami Hmar chu inelna ṭan tirh aṭangin player pawimawh a ni. Kolasib nula hi forward ni mah se ball sem turin an pawt hnung nasa, midfield luahtu a nih ṭhin avangin goal a khung hnem lo.

Thenzawl Hockey training center aṭanga inzir chhuak hian goal khung loh tawp erawh a thei lo. Pool match hnuhnung bera Canada nen an inkhelh ṭumin goal pawimawh a khung, hun tawp dawna a goal khung vangin India hi 3-2 in an chak a, semifinal a hruai thleng.

Bronze medal inchuhna inkhelah pawh hmun pawimawh a chang a, hun tawp boruak sangah yellow card hmu hial khawpin India tan a ṭang na - penalty corner vawi hnih a hlawh chhuak a, an vanneih ṭum ni se India tan goal khung theihna tur a ni.

Remsiami hian India tan - Asia Cup 2017 (Gold), Asian Games 2018 (Silver), Asian Cup 2022 (Bronze), Asian Champions Trophy 2018 (Silver), Youth Olympic Games 2018 (Silver), Tokyo Olympic 2021 (4th position) leh Commonwealth Games 2022 (Bronze) te a la tawh.