CWG 2022-a gold medal latu Jeremy-a hmuah a ni dawn

Mizo tlangval, khawvel hmuha India leh Mizoram chawimawitu Jeremy Lalrinnunga chu vawiin hian a lo haw dawn. Chawhnu dar 2:25 hian Lengpui Airport a rawn thleng ang a, hetah hian chanchinbu mite nen inkawmna an nei nghal ang.

Ruahman dan chuan Lengpui aṭang hian dar 2:50-ah Aizawl panin an haw pui ang. Hunthar lamah kalin - Bawngkawn, Ramhlun, Zarkawt, Treasury Square, Sikulpuikawn, Khatla leh Temple Square lamah kawng zawhpui a ni ang a, an chenna Ainawn Veng (Govt Complex) ah an lut thla dawn a ni.

Commonwealth Games neih laiah Jeremy hian weightlifting 67kg huangah gold medal a chawi chhuak. Mizoram sorkar chuan Lengpui Airport-a lo hmuah dan tur hi ruahmanna a siam a, chawlh hun a neih rei loh avangin tun ṭumah hian a hranpa a lawmpuina hun erawh buatsaih a ni rih lo ang.

Sports & Youth Affairs minister Robert Romawia Royte hoin, Sports & Youth Affairs Conference Centre-ah Jeremy chungchang ngaihtuah niin, a buaipui tur organising committee an din hran leh a ni.

Mizoram sorkar ruahman dan chuan August 9, Thawhlehni hian chief minister Zoramthanga'n Jeremy hi thingpui a inpui ang. August 10, Nilaini hian Chief of Army Staff hmu turin Aizawl a chhuahsan leh nghal a ngai dawn a ni.