Liverpool nomawi beiseina a nghing nghal!

Premier League-a champion rinkai sawi apiangin Manchester City leh Liverpool lam dun an ni a, hei hian Pep Guardiola leh Jurgen Klopp ten English football an thunun hnehzia a hrilhfiah.

Mahse, Liverpool erawh tun season Premier League-a an match hmasa berah an chesual nghal a, Inrinni zan khan kai thar Fulham chu khualmualah 2-2 in an inhnehtawkpui hram - season hmasaa point khat leka champion City phak lotu hian vawi khat draw pawizia an hria ang.

Fulham tan Aleksandar Mitrovic chu player hmuhnawm a ni a, Serbian striker hian Liverpool defender ṭha Virgil van Dijk a hre ve lo emaw tih mai turin a chaih phar - goal hnih a khung a, goal khat zawk hi penalty aṭanga a khung a ni.

Liverpool tana lawmna tur pakhat chu Darwin Nunez-a'n English football-a insiamrem tura hun a mamawh rei lo hi a ni a, Premier League-a a match hmasa berah goal a khung nghal - Reds goal dang hi Mohamed Salah khung a ni.

Fulham an huai
Championship champion Fulham-in Liverpool an hlau lo a, second 50-na lekah Mitrovic chuan goal khung a tum nghal a, mualneitu team hian chak an tum ngam dawn tih an pholang.

Liverpool tlarhnung an talbuai a, Reds fan-ten thin thiin inkhel an en lo - minute 32-naah Fulham lam hian an khung ta nge nge a, Kenny Tete-a cross ṭha tak chu Mitrovic chuan hmahruaina goal atan a tauh lut a, Trent Alexander-Arnold-a'n a tih tur a ti tawk lo.

Liverpool-in si phurh an sut lawk theih loh avangin Klopp-a'n Roberto Firmino la chhuakin, Nunez a luhtir a, Uruguayan striker hian minute 64-naah mawi zetin si phurh a sut zui.

Reds-in na takin nawr zui mah se Fulham bawkin goal an khung zui a, Van Dijk-a'n Mitrovic a tih tluk avangin penalty a chawi. Penalty pek nan a nem hret niin lang mah se referee a thu ber miau a, Mitrovic chuan goal-ah a chantir.

Buaina thuah hnih
Mitrovic-a goal hnihna a luh hnuah Liverpool an hnual phah lo. Minute 80-naah Salah hun a inher chhuak a, Nunez-a ball dawn fuh tawk lo per aṭanga ball kal chu si phurh sut nan a khung.

Liverpool tan Jordan Henderson-a'n bar a pet per dawp zui a, uiawm tak a ni. Hetihlai hian Luis Diaz chu offside vangin a goal khung pawmsak a ni lo a, post a pet per bawk - Fulham tan Neeskens Kebano-a'n post a pet per ve tho tih hriat erawh a ṭha.

Reds midfielder Thiago Alcantara chu minute 51-na lekah hliam vanga lakchhuah a ngai a, he thu buatsaih a nih lai hian Spanish midfielder chawlh chen tur hi sawi theih a la ni lo.

Liverpool boss Klopp chuan, "Khel chhe em em chungin point kan hlawh a, a tir aṭangin kan rilru puthmang a dik lo. Point khat aia tam hmuh kan phu lo a, kan tih tum kalh chiahin thil kan ti a ni," a ti a, an khelh danah a lawm lo.

Hei le Spurs
Southampton-in Tottenham Hotspur lakah goal hmahruai khung mah se Spurs-in hnehna chang turin harsatna dang an tawk zui lo a, goal li an khung avangin an mikhual lakah 4-1 in hnehna an chang.

Saints tan an thiampuipa James Ward-Prowse chuan minute 12-na lekah goal hmahruai a khung a, mahse, mikhual team goal khung hi Antonio Conte naute chhaih kawlhna goal mai a ni.

Spurs tan Ryan Sessegnon chuan minute 21-naah khel ṭha Dejan Kulusevski siamsak chu goal-ah a chantir a, Kulusevski hian an goal lina a khung ve bawk - he goal inkarah hian Eric Dier chuan Son Heung-min siamsak chu kum thum hnua a goal hmasa ber ni turin a khung a, Saints centre back Mohammed Salisu chuan Emerson Royal-a cross chu an lamah a tilut bawk.

Tottenham boss Conte chuan, "Point thum pawimawh tak kan hlawh a, mahse, chu zawng aia pawimawh chu kan point hlawhchhuah dan kha a ni - ball kan chan leh chan loh lai pawhin kan khel ṭha a, pressure kan pe ṭha em em bawk," a ti a, a naute khelh danah a lawm hle.

August 5, Zirtawpni Zan
Crystal Palace 0 - 2 Arsenal
ARS: Gabriel Martinelli 20'; Marc Guéhi 85' (OG)

August 6, Inrinni Zan
Fulham 2 - 2 Liverpool
FUL: Aleksandar Mitrovic 32', 72' (P)
LIV: Darwin Nunez 64'; Mohamed Salah 80'

Bournemouth 2 - 0 Aston Villa
BOU: Kieffer Moore 80'; Jefferson Lerma 80'

Leeds United 2 - 1 Wolverhampton

LEE: Rodrigo 24'; Rayan Aït Nouri 74' (OG)
WOL: Daniel Podence 6'

Newcastle United 2 - 0 Nottingham Forest
NEW: Fabian Schär 58'; Callum Wilson 78'

Tottenham Hotspur 4 - 1 Southampton
TOT: Ryan Sessegnon 21'; Eric Dier 31'; Mohammed Salisu 61' (OG); Dejan Kulusevski 63'
SOU: James Ward-Prowse 12'

Everton 0 - 1 Chelsea
CHE: Jorginho 45+9' (P)