Chak duha tuihal kan chak - Arteta

Mikel Arteta enkawl Arsenal chuan ṭha takin Premier League season bul an ṭan. Gunners hian Crystal Palace 2-0 a an luhchhuah hnuah manager chuan chak duha tuihal an nih avangin a naute inkhel a hmuhnawm tih a sawi.

Zirtawpni zan Selhurst Park Stadium-a inkhelah Arsenal lamin bul an ṭan fuh takzet a, striker thar Gabriel Jesus chuan Palace tlarhnung a chhaih buai thei hle. Amah thlawptu Gabriel Martinelli leh Bukayo Saka te pawh Palace tlarhnung tan an hnawk.

Manchester City aṭanga lak thar Oleksandr Zinchenko pawhin bul a ṭan nghal, ani hian minute 20-naah Martinelli tauh luh tur a siamsak. Jesus-a'n Martin Odegaard tan hun ṭha a siamsak a, mahse captain thar hian goal a sual chhuak thei lo.

Second half-ah Patrick Vieira enkawl Palace an kang hret a, keeper Aaron Ramsdale tan hna an siamsak zeuh zeuh. Mahse, mual sira dah Ben White-a'n Wilfred Zaha a dahṭha thei a, an hmanraw hlauhawm ber chu che thei loin a siam.

William Saliba-a'n Arsenal tana Premier League a khelh hmasak berah a che ṭha bawk. Kum 21 mi defender hian ball kang a tauh chhuak thei hle a, a din pui Gabriel nen an inkawp rem viau - White a awm bawk avangin tlarhung laiah pathum an ding chhunzawm a nih pawhin a mak lo ang.

Hun tawp dawn lamah Palace lamin si phurh sut an tum, nawr na viau mah se mual sira awm Saka an veng hneh lo. England international hian a ball lakluh chu na takin box chhungah a cross lut a, defender Marc Guehi chuan anmahni lamah lo tauh lutin an beiseina a ti tawp.

Arsenal manager Arteta chuan, "Pre season inbuatsaihna kan nei ṭha a, ka naute inbuatsaihna ka hmuh khan tun ang a game ṭha hi chu ka beisei lawksa ngam reng a ni. An rilru put hmang a dik a, chak duhin an tuihal takzet.

"Inkhel thunun tumin kan zin chhuak a, kan tum ang ngeiin Selhurst Park Stadium-ah inkhel thunun chungin goal hlauhawm kan siam hnem," tiin a naute khelh danah a lawm hle, second half an khelh danah erawh goal an chhuah lo kha vannei tia sawi theih an ni ve tho.

Season hmasa khan Selhurst Park Stadium-ah Arsenal hi 3-0 in an mualpho. Emirates Stadium-ah pawh hun tawp dawnah an siphurh sut zo hramin, 2-2 in an inhnehtawk a nih kha. An tan Vieira enkawl Palace laka point thum hmuh hi result ṭha leh hmasawnna chu a ni.