Chelsea an chak; lawm a kim lo

Premier League champion tum ngam zinga mi Chelsea chuan an match hmasa berah hnehna an chang nghal a, Inrinni zan khan khualmualah Everton chu 1-0 in an hneh.

Chelsea goal awmchhun hi first half hun pek belh minute kuanaa lut a ni a, Jorginho chuan penalty aṭanga chhuih lutin, hun tawp thleng goal dang a lut tawh lo.

Penalty hi Ben Chilwell hlawhchhuah a ni a, Abdoulaye Doucoure chu English defender lakah hian foul-in penalty a chawi a, Everton tan penalty hmanga chak loh hi a na khawp ang.

Chelsea tan nipui transfer-a player lak thar Kalidou Koulibaly leh Raheem Sterling ten inkhel bul an ṭan a, pound maktaduai 62 man Marc Cucurella chu minute 75-naah bench aṭanga luhtir a ni bawk.

Sterling-a'n goal khung lo mah se Chelsea tan tlarhmaah player hlauhawm a ni thei dawn tih a khelh dan aṭangin hmuh theih turin a awm a, Koulibaly erawh fak chiam turin Everton aṭangin enchhinna a dawng ṭha tawk lo.

Frank Lampard enkawl Everton hian Richarlison chu Tottenham Hotspur laka an chân bakah, striker Dominic Calvert-Lewin chu hliam vangin a inlan thei lo bawk a, English top flight league-ah beisei neih an tum a nih chuan Merseyside club hian transfer-ah tlarhma player tur zawn an la mamawh.

Everton hian West Ham nena sawizawm hlawh hman Amadou Onana chu pound maktaduai 33-in an lalut dawn a, mahse, Lille player hi defensive midfielder niin, Paris St-Germain aṭangin defensive midfielder tho Idrissa Gueye an dawr mek bawk.

Chelsea tan pawh inen-fiahna tur a awm - £62mtd man Cucurella lansarh lai ber chu yellow card a hmuh chu a ni a, duh angin an inkhel a la nung tawk lo bawk.

Mahse, London club hian khel ṭha lo chungin khualmualah point thum an hlawh chuak thei a, nipui transfer-ah player lakluh belh an la tum bawk avangin tunah chuan hlim taka chak lawm mai chu tih tur a ni.

Chelsea boss Thomas Tuchel chuan, "Hnehna kan chang a, hnehna chan hi a hlu ber lai chu a ni. Mahse, kha aia ṭha zawka khelh erawh kan mamawh," a ti a, player lak tharte nen hun an la hman ho tam loh avangin duh anga an la khelh theih loh thu a sawi bawk.