I Day Football boruak a 'hot' chho zel

Football ngainaah pawh tualchhung football ngaina chin tan hun duhawm a inher chho mek. I Day Football-ah inkhel hmuhnawm thlir tur a awm a, result aṭanga thlir pawhin team ṭha bik an awm lo.

Inrinni khan Electric Veng chuan team ṭha ber tura ngaih Mizoram Police chu 2-1 in an hneh a, inkhel dangah Chhinga Vengin an elpui Chanmari FC chu 3-0 in an sawp. Group A team paliten point thum vek an hmu a, tling thei leh tla thei vek an ni. August 9, Thawhlehni hian group match hnuhnung ber an khel ang.

Chanmari sawptu Chhingcows
Chhinga Vengin an match hmasa berah Mizoram Police an hneh lo a, match hnihnaah an insiamṭha. Chhingcows leh Chanmari inkhelah hian first half goal a lut lo a, team pahnih an inhnehtawk hle.

Second half-ah Chhinga Veng tan Serchhip tlangvalte an che ṭha a, Lalrinzuala'n goal hnih a khung bakah penalty aṭangin Johny Lalremruata'n a khung bawk. Rinzuala hian Police an hneh loh ṭumin penalty a hlah a, Chanmari lakah erawh a class sanzia a pholang thung.

Electric an êng
Mizoram Police-in inhliam leh damlo an ngah a, coach Lalbiaksanga Colney-in player siksawi nasa mah se goal an khung hmasa zawk. Minute 25-naah Lalbiakhlua (Hlutea) freekick pet chu captain Lalfakzuala'n ball kang laiin a ke veilamin a pet goal, Electric Veng lakah Police-in 1-0 in hma an hruai.

Second half-ah erawh player naupang zawk Electric Veng an che ṭha. Minute 59-naah Vanlalremsanga'n mawi zetin a volley goal a, Eletric Vengin siphurh an sut. Coach Jacob Lalrawngbawla hoten group stage paltlang ngei an tum a, minute 80-naah Tetea freekick chu substitute Saidingliana'n ṭha zetin a tauh goal. Goal dang a luh belh tawh lo a, Electric Veng 2-1 in an chak.