Goal hnih nena bul ṭantu Messi

Lionel Messi-a'n duhthusama ṭhain Ligue 1 season a khuh hawng a, a hlawkna teltu chu Paris St-Germain an ni. Inrinni zan inkhelah Messi-a'n goal hnih a khung bakah Neymar khung tur siamsakin, a team hi Clermont mualah 5-0 in hnehna a chanpui.

Neymar hnathawh sawi hmaih theih a ni lo. Brazilian forward hian Achraf Hakimi, Marquinhos leh Messi te khung tur a siamsak bawk a, team tan a thawh hlawk takzet - hliam tenau vangin Kylian Mbappe a la tel lo mah mah.

Khel ṭha viau mah se Messi-a'n goal khung turin a nghah rei a ngai, Minute 80-naah Neymar siamsak a khung, Barcelona tana a khelhpui Neymar hian keeper chauh hmachhawn tawh mah se a ṭhianpa tan hian a siamsak.

Messi hian a la duhtawk mai lo, hun tawp hma deuhin Leandro Paredes a ball pek chu a awmin a dawng a, ball hi a kan laiin Messi hian boruak a vir chungin a bin goal - keeper Mory Diaw tan tih ngaihna a awm lo.

Season hmasa khan Argentina captain hian Ligue 1-ah goal nga chiah a khung, tun season-ah erawh a record hmasa hi a khum ngei a rinawm, khum turin match pawh a mamawh tam dawn lo niin a lang.

Mauricio Pochettino thlaka PSG enkawltu Christophe Galtier-a'n a team thar a enkawlna match hmasaah chiang takin an chak, tlarhma an hriam bakah a hnunglam an venhim ṭhat avangin lawmna tur a ni ang.

Galtier chuan, "Lawmna tur tam tak a awm, a pawimawh ber erawh hnehna kan chang hi a ni. Ka player ten goal an nawr dan khan min tilawm hle, mahni chauh inngaihtuah loa ṭhiante tana an khel kha a hmuhnawm takzet.

"Super Cup pawh kha kan khel ṭha pangngai viau, tunah chuan khami ai khan kan khel ṭha lehzual. Goal khung hi Paris Saint-Germain thisen nen a inzawm tlat a, match dangah pawh attacking game hmuhnawm kan khelh theih ka beisei," tiin a sawi.

Ligue 1 lamah chuan harsa vak loin PSG hi an champion leh maiin a rinawm, club thuneitu lam lawmna tur erawh league nomawi chauh a ni dawn lo. Arab sumdawng hausa hian Champions League an duh - coach thar Galtier hoin lak an tum ang.

PSG tana lawmna tur dang chu Sergio Ramos a dam ṭha ta hi a ni bawk ang. Real Madrid captain hlui hi season hmasa khan hliam vangin an chhawr mumal lo. Tun season-ah erawh Marquinhos leh Presnel Kimpembe te nen tlarhnung laiah an inkawp nghal, an nghet ṭha hle.

Ligue 1 inkhel dangah Lyon chuan Ajaccio 2-1 in an hneh, Arsenal striker hlui Alexander Lacazatte chuan Lyon tan hian minute 22-naah penalty aṭangin goal hmahruai a khung. AS Monaco chuan Strasbourg 2-1 in an hneh ve bawk.