FIFA-in India a mihran dawn em?

Football thuneitu sang ber FIFA chuan khan August 5 khan All India Football Federation chu lehkha thawnin India chu hremah a vau bakah October-a FIFA Under 17 Women's World Cup a thlen tur chu chhuhsakah a vaukhan bawk.

FIFA hian India rama football inrelbawlnaah 'pawn lam mi' an inrawlha an hriat thu leh, India football buaina chingfel tura FIFA nena inremna siam bawhchhiatna a awm ngeiin an hria a, he mi chungchang hi sawifiah turin AIFF lam hi an hriattir nghal bawk a ni.

He lehkhaah hian FIFA General Secretary Fatma Samour leh Asian Football Confederation (AFC) General Secretary Datuk Windsor John-te'n hming an ziah hnan ve ve a, AIFF lamin buaina chinfel dan an ngaihtuah ran loh chuan FIFA-in India hi a ban lo ang tih a sawi theih ta lo.

AIFF constitution thar siamnaa FIFA-in rawtna a neihte chu AIFF enkawltu lailawk tura Supreme Court-in a ruat Committee of Administrators (CoA) chuan a ngai pawimawh tawk lo a, June thlaa FIFA-AFC aiawh lo zinten rawtna an siam chu CoA hian Supreme Court (SC) lamah pu lut loin anmahni duh angin dan an siam a, hei hi FIFA chuan a pawm thei ta lo - pawn lam miin (CoA/SC) FIFA rawtna kalha football inrelbawlna dan an siam hi FIFA chuan a pawm lo.

State Football Association lam pawhin CoA rawtna siamte hi pawm loin SC-ah a khing let a, nimahsela SC hian CoA rawtna ang hi a kaltlangpui ta thung. Inthlanna buatsaih dan, voting right neitu leh AIFF kalphung tura FIFA-AFC duh anga State FA rawtna chu CoA hian hnawlin SC lamah rawtna hran an chhawpchhuak a, hei hi SC chuan a pawm a; nimahsela football thuneitu sang FIFA chuan a pawm thei ta lo.

FIFA ban pumpelh dan awm chhun chu SC-in a thutlukna a sût chiahin a ni ta a, chumi tur chuan State FA aiawhte'n review petition nei turin SC-ah an thlen leh dawn a, sorkar laipui pawhin SC hi an dawr dawn nia thu dawn a ni - sorkar laipui hian World Cup thlen ngei duhin FIFA hrem pumpelh dan hi a ngaihtuah ve mek.

SC hian a thutlukna a ennawn a, FIFA duh anga AIFF inthlanna a kalpui chuan hrem hi pumpelh theih a nih hmel a, a nih loh chuan India hi FIFA-in a mihran ang a, India rama football inkhel zawng zawng hi FIFA hriatpui loha 'inkhualtelem' chauh a chang thei!

FIFA hian August 9 hmaa insawifiah turin AIFF chu a hriattir a (FIFA hian CoA leh SC a dawr lo a, a hnuaia awm AIFF chiah a dawr); State FA leh sorkar laipui lamin hremna pumpelhtir tumin SC lam an dawr ve leh dawn niin a lang a, tun aṭanga ni rei lo teah India football hmalam hun a hriat ang.