Medvedev tan nomawi pakhatna

Mipa tennis world number 1 Daniil Medvedev chuan tun season bika a vawi khat nan nomawi a chawi. Russian tlangval hian Los Cabos Open final-ah Cameron Norrie chu 7-5, 6-0 a hnehin nomawi a chawi.

Season hmasa khan Medvedev hian US Open nomawi a chawi a, a hnu lamah hlawhtlinna chan leh a harsat. New York khawpuia a hlawhtlin hnuah tun ṭum hi nomawi a chawi lehna hmasa ber a ni hial.

Kum 26 mi Norrie erawh a vanduai tluang zel. British number 1 hi final bikah vawi nga a chak lohna a ni. Nomawi chawi theihna remchang a hmuh hoah beisei angin a hlawhtling tawk lo.

Medvedev chuan, "Cam hi player ṭha tak a ni a, hmachhawn a awlsam lo hle. Ani nen kan intawng a nih chuan a ṭha thei ang bera khelh a ngai ziah, set hmasa zawk phei kha chu harsa takin ka la hram," a ti.

Russia leh Ukraine buaina vangin Medvedev hian Wimbledon kha a khel thei lo. Grass court inelna lian ber khel thei lo mah se hard court-ah a lo kir leh nghal a, tun thla tawpa khelh tur US Open atan inbuatsaihna a nei ṭha hle.