SAFF U20-ah India champion

South Asian Football Federation (SAFF) Under-20 Championship-ah India rawlthar rual an champion a, Zirtawpni zan khan final-ah Bangladesh chu 5-2 in an hneh.

Mizo tel lohna India hian league round-a an match hmasa berah Bangladesh hi 2-1 in an lo ngam lo tawh a, Kalinga Stadium, Bhubaneswar-a team pahnih an intawn hma hauhin chak tur zawk rinthiam a harsa.

Mahse, India hian goal khung turin hun an mamawh rei lo - inkhel ṭan aṭanga second hnihna lekah Bangladesh goalkeeper Md. Asif chu Gurkirat Singh lakah a foul a, penalty a chawi.

Mumbai City forward Gurkirat hian penalty hi goal-ah a chantir a, mahse, chawlhlawk hmain Rajon Howleder chuan minute 45-naah Bangladesh tan si phurh a sut a, 1-1 a ni fel der.

Gurkirat hian second half-ah India hi hma hruai nawnpui mah se Shahin Mia chuan Bangladesh tan a khung ve leh a, minute 90 chhunga goal dang a luh loh avangin extra time khelh a ngai.

Extra time erawh India chanpuala pek emaw tih mai a awl - Gurkirat-a'n goal hnih khung lehin hattrick a siam fel der a, Indian Arrows forward Himanshu Jangra chuan goal khat thawh ve bawkin, a tawpah a thlengtu India hi 5-2 in an chak a, coach Shanmugam Venkatesh kaihhruaina hnuaiah an champion.

India champion zinkawng
July 27, Nilaini Zan
Bangladesh 2 -1 India
BAN: Nova 9', 45' (P)
IND: Gurkirat 35'

July 29, Zirtawpni Zan
India 4 - 0 Sri Lanka
IND: Jangra 50'; Gogoi 69', 90+3'; Gurkirat 74' (P)

July 31, Pathianni Zan
Nepal 0 - 8 India
IND: Taison 32', 66'; Gogoi 50', 52'; Jangra 70'; Bag 78';
Gurkirat 89'; Paul 90+3'

August 2, Thawhlehni Zan
India 1 - 0 Maldives
IND: Gurkirat 89'

August 5, Zirtawpni Zan - Final
Bangladesh 5 - 2 (a.e.t) India
BAN: Rajon Howleder 45'; Shahin Mia 62'
IND: Gurkirat Singh 2', 60', 93', 99'; Himanshu Jangra 92'
*Hun pangngaiah 2-2 in an inhnehtawk a, extra time-ah 5-2 in India an chak

Top Scorer Gurkirat Singh, 8 goals (India)
Most Valuable Player Gurkirat Singh (India)
Golden Gloves Som Kumar (India)