Lewy tel lohna Bayern-in goal surtir

Bayern Munich-in season tharah Robert Lewandowski tel loin goal khung kawngah buaina an nei lo. Zirtawpni zan khan Bundesliga match hmasa berah Eintracht Frankfurt an hmachhawn a, 6-1 in an sawp.

Bavarians tan hian rawlthar duhawm Jamal Musiala-a'n goal hnih a khung a, Liverpool aṭanga an lakluh Sadio Mane-a'n Bundesliga match hmasa bera goal a khung bakah Joshua Kimmich, Benjamin Pavard leh Serge Gnabry ten goal khat ṭheuh an khung.

Hei le, Bayern
Ṭan phat aṭangin Bayern player-te an che rang zawk a, an inkhel a nung zawk. Julian Nagelsmann hote 'attacking third' ah an hmuhnawm a, Frankfurt tlarhnungin an chelh lo. Hriat tel atana ṭha chu Frankfurt hi Europa League champion an ni a, tun season-ah pawh Champions League an khel dawn.

Lewy tel lohna Bayern-ah Sadio Mane, Thomas Muller leh Serge Gnabry te tlarhmaah an awm a, player pathum hi awm hmun nghet nei loin an intlan thelh nalh ṭhin hle. Mane, Muller leh Gnabry thlawptu Jamal Musiala a hmuhnawm a, bench-ah Leroy Sane te an la awm avangin Lewy awm lo pawhin an goal bawh a na chhunzawm zel ang.

Bayern tlarhnung erawh a phui tawk lo a, an goal chhuah chhan erawh captain Manuel Neuer chetsual vang ni mah se tlarhnung siam ṭhat erawh a la ṭul. Ajax leh Juventus aṭanga an lakluh Noussair Mazraoui leh Matthijs de Ligt te bench aṭangin an lut a, Nagelsmann leh a hoten Europe-a champion an tum a nih chuan tlarhnung an tih phui ṭhat a pawimawh ang.

Inkhel dang
Bayern elpui ber tura ngaih Borussia Dortmund-in Bayer Leverkusen chu Marcu Reus-a goal hmangin 1-0 in an hneh. Dortmund tan Leverkusen laka point thum hlawhchhuah hi a ṭha a, amaherawhchu chanchin lawmawm lo a awm.

An forward thar Karim Adeyemi chu minute 23-na lekah inhliam vangin thlak a ṭul a, Thorgan Hazard-a'n a thlak. Dortmund hian an striker chhuanvawr Erling Haaland chu Man City-ah an chhuahtir a, a thlakna tura an lakluh Sebastien Haller a cancer avangin tlarhma lamah an buai mek.

Chutihrualin Dortmund CEO Hans-Joachim Watzke chuan Haller thlakna tur forward thar lakluh an tum thu a sawi.

August 5, Zirtawpni
Eintracht Frankfurt 1 - 6 Bayern Munich
EIN : Randal Kolo Muani 64'
FCB : Joshua Kimmich 5'; Benjamin Pavard 10'; Sadio Mane 29'; Jamal Musiala 35', 83'; Serge Gnabry 43'

August 6, Inrinni
Union Berlin 3 - 1 Hertha Berlin
UNI : Theoson Siebatcheu 31'; Sheraldo Becker 50'; Robin Knoche 54'
HER : Dodi Lukebakio 85'
Borussia M'gladbach 3 - 1 Hoffenheim
BOR : Ramy Bensebaini 42'; Marcus Thuram 71'; Nico Elvedi 78'
HOF : Robert Skov 25'
Wolfsburg 2 - 2 Werder Bremen
WOL : Lukas Nmecha 11'; Josuha Guilavogui 84'
WER : Niclas Fullrug 21'; Leonardo Bittencourt 23'
Bochum 1 - 2 Mainz
BOC : Kevin Stoger 39'
MAI : Karim Onisiwo 26', 77'
Augsburg 0 - 4 Freiburg
FRE : Michael Gregoritsch 46'; Vicenzo Grifo 47'; Matthias Ginter 61'; Ritsu Doan 78'
Borussia Dortmund 1 - 0 Bayer Leverkusen
BOR : Marco Reus 9'