A thiam pali zingah Germany leh Chile Portugal Vs Chile; Germany Vs Mexico

FIFA Confederations Cup 2017 semifinal khel tur a hriat kim ta. Pathianni zan khan Group B aṭangin Germany-in Cameroon 3-1 in an hneh a, Chile-in Australia lakah point khat hlawh chhuakin semifinal an lut.

Final khel tur zawnna hi June 28-29 ah khelh a ni dawn a, Nilaini zan dar 11:30-ah Portugal leh Chile ten an khel ang a, Germany leh Mexico te Ningani zan dar 11:30-ah an inhmachhawn bawk ang.

Pali tan hmunruak 2
Group B match hnuhnung ber khelh hma hian team paliin semifinal an lut thei vek a, head to head en a nih avangin point li hmu Chile leh Germany te an khingpui point khat hmu Australia leh Cameroon lakah an him lo.

Pathianni zanah Chile leh Australia te Moscow-ah an in­hma­­chhawn a, Sochi-ah Ger­ma­ny leh Cameroon te an inkhel bawk.

Germany nge nge
Germany-in African cham­pion Cameroon lakah harsatna an tawk lo. Die Mannschaft-in minute 48-naa Hoffenheim midfielder Kerem Demirbay goal hmangin hma an hruai a, RB Leipzig forward Timo Werner-a'n (66’, 81’) goal hnih a khung bawk. Cameroon-in FC Porto forward Vincent Aboubakar hmangin minute 79-naah goal khat khung ve mah se minute 64-naa Ernest Mabouka hnawhchhuah a nih avangin Joachim Low nauten harsatna an tawk lo.

Germany hian Low hnuaiah match 150 an khel tling ta a, Cameroon laka an chak hi an vawi 100 chakna chiah a ni. World Cup 2014-a Die Mannschaft champion puitu coach Low hian kum 2006 khan Jurgen Klinsmann thlakin head coach hna hi a chelh ṭan a, vawi 27 a khingpuite draw-in vawi 23 an chak lo tawh bawk a, an chak loh hnuhnun ber chu thla 11 liam taa Euro 2016 semifinal-a France an hneh loh kha a ni.

Tun ṭuma Germany team danglamna chu Low-a'n team ṭha ber thlang loin player beiseiawm rual a thawhchuahpui a, tawn­hriat la ngah lo mah se South American champion Chile awm­naah group hma­hruaitu an ni.

Die Mannschaft tana goal hmahruai khungtu Kerem Demirbay hi Turkish ni mah se Germany-a piang leh sei lian a ni a, Borussia Dortmund aṭanga inzir chhuak niin Turkey youth team tan pawha khel tawh a ni. Kum 23-a upa Demirbay hian Germany tan vawi hnih chiah a la khel a, Hoffenheim midfielder hian starting eleven vawi khat a channaah goal a khung nghal.

Goal hnih khung belhtu Werner hian season liam ta khan RB Leipzig tan khelin Bundesliga-ah hming a chher a, match 31 a khelh aṭangin goal 21 a khung. VfB Stuttgart striker hlui Werner hi ram tan vawi li chiah la inlan mah se kum 21 chauha upa a ni a, Germany-in Miroslav Klose thlakna tur striker ṭha an neih loh avangin goal hnih a khung hma pawh hian feet ruka sang striker hian ngaihven a hlawh tawh a ni.

Chile an tlang hram
Moscow-a inkhel entu 33,639 hmaah Australia-in Chile an chhaih buai a, Asia khawmualpui aiawh hian James Troisi hmanga minute 42-naah hma an hruai avangin Copa America champion an talbuai hle.

Socceroos tan Trent Sains­bury-a'n goal hnih khung theih­na hun ṭha a hlah a, hei hi Australia hian tuarin Chile tan substitute Martin Rodriguez-a'n minute 67-naah an siphurh a sut. Team ṭha zawk Chile-in goal dang an khung belh tawh lo a, Alexis Sanchez leh Arturo Vidal-a telna team-in semfinal an lut - Group B pahnihna ni mah se champion rinkai an la ni reng.

Australia coach Ange Poste­coglou chuan, "He inelnaa khelh zel hi kan duh a, group stage paltlang kan duh. Kan theih tak loh avangin kan hnual hle a ni. Chutihrualin khawvel team ṭha ber zinga mi kan khel a, kan khelh danah kan lungawi e," tiin a rilru nat thu a zep lo.

Chile coach Juan Antonio Pizzi chuan, "Kan khingpuite kan duh anga khelh min phalsak lo a, kan tum angin kan khel lo. Kan khingpui hi kan dah hniam lo a, kan khelh ṭhat loh chhan hi over confidence vangah ka puh lo. A chhan ber chu kan khingpui te an khel ṭha a, chak an tum em a ni," tiin beisei an phak loh chhan a sawi.