Kvitova kutah nomawi

World number 2 ni tawh ṭhin Petra Kvitova chu tennis a khelh thiam­na a ban vei lam hliam sak a ni a, a hliam a dam hnuah Pathianni zan khan Aegon Classic nomawi a chawi leh ta.

Wimbledon inbuat­saihna tournament pakhat Aegon Classic final-ah Kvitova hian Australian rawlthar Ashleigh Barty chu 4-6, 6-3, 6-2 in a hneh. Kvitova-i'n a service neih ṭhat zar zovin vawi 13 ngawt aces a siam thei a, inkhel inhnehtawk takah a dinchan phah.

Kum 27-a upa Kvitova hi nikum December thla khan Czech Republic-a a chenna inah chemte hmanga beih a ni a, a inkhelh thiamna lam hliam sak niin zai a ngai hial a, thla nga chuang zet a chawlh a ngaih phah.

Thla hmasa a neih French Open-ah khan Kvitova hi a rawn kir a, Ro­land Garros-ah hian second round a paltlang lo. A hliam dam hnua a tournament khelh pahnih­naah erawh nomawi a chawi thei leh ta a ni.

Seeded pasarihna Kvi­tova chuan, "Hring­nun ka hman ve tawh china hun harsa ber chu ka paltlang taah ka ngai. Tennis chauh ni loin hri­selna ṭha ka neih leh tak avangin ka lawm hle," tiin a hliam dam hnua a nomawi chawi hmasak ber vanga a lawm thu a sawi.

Wimbledon vawi hnih champion tawh Kvitova chuan sawi zawmin, "Grass-a inkhelh hi nuam ka ti a, ka inkhelh theih loh chhung pawha ka thil chak ber pa­khat chu grass court ngeia final khelh hi a ni. Wim­bledon khelh dawn hnaiah result ṭha ka nei hi ka lawmin inrintawkna ka neih phah ngei ang," tiin a sawi.