India aiawh tur Jeremy leh Zakhuma
September 3-9 chhung hian Commonwealth Senior, Junior & Youth Championships chu Gold Coast, Australia-ah nei a ni dawn, he inelnaah hian India aiawhin Mizo weightlifter Jeremy Lalrinnunga, Zakhuma leh Lalchhanhimi te an inlan ang.
International Weightlifting Association hnuaia inelnaa India aiawha tel tur thlanna hi kar hmasa khan Patiala, Punjab-ah neih a ni; Mizo inlan panga zinga pathum chu an tling.
National bakah international thlenga sulhnu ṭha hnutchhiah tawh Jeremy Lalrinnunga chuan 56kg category a chawi turin snatch 105kg, clean & jerk 115kg, total 220kg chawin a tling.
Govt Complex naupang hian nikum khan Commonwealth Youth-ah gold medal a dawn bakah IWF World Youth leh Asian Youth-ah silver a la a, kuminah IWF World Youth bikah silver a dawng leh tawh bawk.
Govt Complex naupang pakhat zawk Zakhuma hi nikum khan IWF World Youth-ah 14-na a ni a, kuminah hmasawnna hmuh beisei a ni. India aiawh tur zawnnaah hian 56kg category-ah tho hian 100kg, clean & jerk 122kg, total 222kg chawiin ṭum dang aiin a cheṭha.
Mizo rawlthar duhawm Jeremy leh Zakhuma te hi Sports and Youth Servives coach Malsawma Khiangte kaihhruaina hnuaia catch them young policy aṭanga bulṭan niin tunah hian Army Boys Institute, Pune-a inzir lai an ni a, hetah hian Mizo coach Zarzokima leh Gubala Slovakia ten training an pe - Mizoram tan mai ni lo India tan an feh chhuak fo tawh.
Hmeichhe inelna lamah Lalchhanhimi chu Commonwealth Senior Women 90kg category-ah a inlan ang. Weightlifting weight category siam thar dan chuan - 48kg, 53kg, 63kg, 69kg, 75kg, 90kg leh +90kg te an ni. Chhani hi tunah hian 75kg bawr vel a ni a, amah hrechiangtu coach-ten 90kg a chawi hian medal dawn theihna kawng a awm zawk an beisei avangin a weight chungah awmtir a ni.