Man chawiin an en dawn a, theihtawp kan chhuah ang - Zotea

I League-a Aizawl FC champion puitu leh CYMA Football-a Ramhlun South nomawi chawipuitu defender Zohmingliana Ralte chuan FPAI XI nena an inkhelh hunah theihtawp chhuah a, chak ngei tuma khelh a duh thu Vanglaini a hrilh.

July 1, Inrinni hian Rajiv Gandhi Stadium, Mualpuiah Mizoram XI leh FPAI XI ten exhibition match an khel dawn a, India rama player ṭha an fuan khawm dawn avangin ngaihven a hlawh hle.

Ramhlun South tlangval Zotea chuan, "Ka ṭhiante nen pawh kan sawi ho a, mipuiten man chawiin inkhel an en dawn a, chak tuma kan khelh hi kan tihtur a ni. Exhibition match tih vanga tih ṭhat peih loh te hi ka duh dan a ni lo a, entu mipuite tana inkhel hmuhnawm phochhuah hi kan hna a ni," tiin exhibition match a lak thutak thu a sawi.

Season hman zawh taka a khelh danah a lungawi thu sawi zuiin, "Ka tan chuan kum ṭha a ni. I League-ah kan champion a, Mohun Bagan lamah champion-na goal tia chhal theih ka khung a, I League-a ka bul ṭanna Shillong Lajong khelmualah nomawi kan chawi a, kan tan chuan duhthusam a ni. Hei bakah hian CYMA Football-ah kan veng team kan champion a, best player-a thlan ka ni lehzel hi ka tan chuan mumang ang mai a ni," tiin Vanglaini a hrilh.

Mizo tlangval hian jersey no. 5 hain Aizawl FC leh Ramhlun South a champion pui a, Mizoram XI-ah pawh hemi number hi a ha ang. Zotea chuan, "Rio Ferdinand hi ka ngaisang a, hei vanga jersey no. 5 ha ka ni," tiin a number hak chhan a sawi.