Russia football team an fihlim?

Infiamna khawvela ram ropui Russia chu an ram sorkar hriatpuina ngeia dan kalha an thil tih hmuh chhuah a ni a, hei hian infiamna huang hrang hrang 30 chuang a nghawng - tunah chuan football lam rik a ni ve leh ta.

Kum 2011-2015 chhung khan Russian infiammi 1,000 chuang zet chuan dan an bawh­chhia tih hriat a ni a, athletle sulhnu nei ṭha tak takten Olympic leh World Cham­pion­ship-a medal an dawn tawh sa pawh lak let sak a ni nual tawh.

Football thuneitu sang ber FIFA chuan, "World Anti-Doping Agency nena thawkdunin 2014 World Cup squad-a player te kha endik nawn an ni a, kan hriat theih chinah chuan dan bawhchhia an awm rih lo, FIFA chuan thil dik lo ti an awm loh hram kan beisei," an ti.

WADA hnuaia Russia chanchin zirchiangtu Dr Richard McLaren-a report-in a tarlan dan chuan footballer 33 te chu dan bawhchhe zingah an tel, tunah hian zirchianna neih zui mek reng a la a ni bawk.

Russia deputy prime minister Vitaly Mutko chuan, "Engtik lai mahin kan football team hian dan phal loh damdawi an hmang ngai lo a, an hmang dawn bawk lo. An inkhelh zawh apiang khan endik zel an ni a, an fihlim vek," tiin infiamna huang dangah hmingchhe tawh mah se football bikah an thianghlim thu uar takin a sawi.

Kum 2014 World Cup-ah khan Russia hi group stage-ah vawi hnih chu an khingpuite nen an inhnehtawk bakah ṭum khat an tlawm, knock out stage an lut phak lo - nakkum hian FIFA World Cup an thleng dawn.

Tun dinhmunah International Association of Athletics Federa­tions (IAAF) chuan Russian infiammite chu athletic huang chhungah an ram aiawha an tel an phal sak lo bur a, August thla a neih tur World Athletics Championship-ah pawh he hremna hi kaltlang pui a la ni ang.

IAAF hian Rio Olympic-ah pawh khan International Olympic Committee (IOC) chu Russian athlete te inlan tir ve lo turin a lo ngen tawh, mahse IOC chuan ngun taka a ngauihtuah hnuah an dan leh hrai zawm famkim theite chu 'neutral athlete' angin an inlan a phalsak ta zawk a ni.