Federer-a'n nomawi nen Wimbledon a nghak
Grass court inelna ngaihhlut ber Wimbledon khelh hun a hnai a, a inbuatsaih nan tournament hrang hrang khelh a ni. Pahtianni zan khan Roger Federer chuan Gerry Weber Open final-ah Alexander Zverev hnehin nomawi a chawi.
Gerry Weber Stadion, Halle-a inkhelah Federer-a'n tennis thiam bik a nihzia lantir nan minute 53 chhung lekin Zverev 6-1, 6-3 in a sawp a, season hmasa semifinal-a a hneh loh lakah phuba lain a vawi kua nan Gerry Weber Open nomawi a chawi.
Kum 35 mi Federer chuan, "Tunkar chhunga ka khelh
ṭhat ber ṭum a ni. Zalen leh nuamti takin final ka khel a, ka khingpui kha na taka pressure ka pek theih reng avangin harsatna ka tawk lo," tiin a sawi. Federer hian tennis a khelh hun chhungin final vawi 140 a khel tawh a, heng zinga 92-ah hian hnehna a chang thei.
Roger a la tar lo
Kumina major tournament hmasa ber Australian Open nomawi a chawi kha Federer tan Grand Slam title 18-na a ni a, Open Era-ah mipa tennis player zingah ani aia inlena liana hlawhtling hnem an awm lo.
Open Era-ah mi pahnih chiah inelna pakhata vawi riat aia tam champion thei an la awm, an hming chu Rafael Nadal leh Federer te hi an ni.
Grand Slam vawi 15 champion tawh Nadal hian Monte-Carlo Rolex Masters, Barcelona Open leh Roland Garros-ah te nomawi vawi 10 ṭheuh a chawi tawh a, a record a ṭha fal hle. Spain tlangval tih lohah chuan Gerry Weber Open nomawi vawi kua chawi thei Federer hi tournament pakhata record nei ṭha a ni.
Swiss star Federer hi kuminah final vawi li - Australian Open, Indian Wells, Miami leh Halle-ah te a inlan a, hnehna a chang fai vek. Hun rei zawk inkhelh a duh avangin clay court-ah a inlan miah lo thung.
Kumina a grass court tournaent hmasa ber Stuttgart Open-ah Federer hi rin loh takin German veteran Tommy Haas lakah a chak lo nghal a, tun ṭumah erawh match nga a khelhah set hloh miah loin a champion thei leh ta a ni.
World number 5 Federer chuan, "Ka kum a tam tawh bakah season hmasa lam khan hliam ka nei ve fo a, ka inkhel tam lo bawk. Kuminah erawh training ka nei ṭhain ka hriselna dinhmun pawh a ṭha bawk. He hmunah ngei pawh hian a tirah kha chuan champion theih ka inbeisei lo, beisei aia ṭha a ka khelh theih avangin ka vannei hle," tiin a sawi.
July 3 aṭangin Wimbledon khelh a ni leh dawn a, Swiss star hian nomawi a chawi leh a nih chuan he inelna bikah hian a vawi riat champion na tur chiah a ni bawk ang.