RG Stadium mawi tur 'The Rs 1 crore boy' Mizoram kal ka châk tawh - Gouramangi Singh
Indian football legend Gouramangi Singh chuan July 1 khian FPAI XI jersey ha chungin Mizoram XI a hmachhawn dawn. Kum 2012-13 season a Prayag United SC-in season khata vaibelchhe 1.05 an hlawhtir avanga phai lam media ten 'The Rs 1 crore boy' tia hminglem an lo pek tawh defender hian, "Mizoram ngeia inkhelh hi ka châk tawh takzet a ni," tiin Vanglaini a hrilh a, football ngainatuten chu hun chu nghakhlel takin an thlir.
"Mizorama inkhelh hi player ten an châk tawh a, India rama hming langsar ber ber rawn hruai kan tum a ni," tiin FPAI president Renedy Singh chuan Vanglaini hnenah a lo sawi tawh bawk a, India international hlui hian dawt a sawi lo - tlarhnunga ding tur zingah Gouramangi Singh-te hming a tel tawh chuan Indian football-ah na na na chuan a aia duhthlan tur a tam chuang lo.
Tu nge Mangi?
Indian football ngaina inti chin tan Gouramangi Singh hming hriat loh hi, Chelsea ṭantu inti chunga John Terry hriat loh nen a danglam chuang lo!
Kum 31-a upa defender hi Manipur lam chhuak niin Mizo legend S. Malsawmtluanga inzir chhuahna Tata Football Academy chhuak a ni a, a career ṭantir lam hi Dempo SC, Mahindra United leh Sporting Goa-ahte a hmang a, kum 2007 khan Churchill Brothers a zawm.
Churchill Brothers-a kum nga a khelh chhungin hming a chher zual a, Australia rama an league sang ber A League club Melbourne Heart-ah trial nei tura sawmna a hmu hial. Manipur defender hian Australia-a Heart-a trial a neih chhungin coaching staff-te mit tlung viau mah se, India tana Asian Cup khelh tum defender hi 'khelmuala hun tam zawk' hman an tiam theih loh avangin inremna an siam thei lo.
Player inngaitlawm
Mangi-a'n India rama champion theihna zawng zawng deuhthawah a champion tawh.
Dempo SC, Mahindra United leh Churchill Brothers-te chu league-ah vawi khat ṭheuh a champion pui a, Federation Cup-ah Dempo leh Mahindra hi vawi khat ve ve a champion pui bawk.
India tan SAFF Cup (2), AFC Challenge Cup (1) leh Nehru Cup (2) nomawi a lo chawi tawh a, AIFF Player of the Year 2010-ah thlan lo ni tawhin 2008-09 season-ah khan I League best defender a lo ni tawh bawk.
Manipur tlangval hian Churchill-a a season tawp berah kum khatah vaibelchhe khat a hlawh a, Prayag United-a season khat a khelh chhungin vaibelchhe 1.05 a hlawh bawk.
A hunlai hian Indian player zingah a hlawh hnem ber a, amah hnaih bertu Sunil Chhetri-a'n nuai 90 a hlawh.
Heti chung hian Manipur tlangval hi a ṭawng uang duh lo. Gouramangi chuan, "Hlawh hnem ber ka nih leh nih loh ka hre lo," tiin nui chungin Vanglaini zawhna a chhang a, heti zat hi a hlawh ngei thu erawh inthlahrung takin a sawi.
Entawntlak Mizoram
Feet ruk leh inches khata sang defender chuan Mizoram fak nghalin, "Mizoram hian football hmasawnna turin hna in thawk nasa a, in chanchin hi hriat loh theih pawh a ni lo. TFA kan awm lai khan Mama hi kan senior a ni a, a hnuah Jerry Zirsanga, Malsawma leh Vanlalrova te an awm leh a, ani kha bul ṭantu chu a ni," tiin Mama a ngaihsan thu Vanglaini a hrilh.
ISL season hmasa bera Subrata Pal leh Syed Rahim Nabi te nen nuai 80 hlawha Indian player hlawh hnem ber dinhmun luahtu Gouramangi chuan, "Mizoramah hian TFA hunlaia ka ṭhiante tam tak an awm a, anni nena inhmuhkhawm pawh a châkawm khawp mai. Ka sawi leh duh pakhat chu Mizoram Football Association hian hna an thawk ṭha em em a, a ram mipui anga in ṭanrualna hmuh hi nuam ka tiin footballer ṭha tak takin chher chhuak reng mai hi a ropui a ni," a ti.
Mualpuiah inhmu ang aw...
"RG Stadium-a kan inkhelh hun tur pawh nghakhlel takin ka thlir a, July 1-ah kan inhmu vek dawn nia," tiin Mizo mipuite inkhel en turin a sawm.