Chuai thei lo Rossi a vul leh ta
Bike intlansiak khawvela a hming dai tawh ngai lo tur Valentino Rossi a vul nawn leh ta. Pathianni zana tlan zawh tak TT Assen MotoGP-ah Rossi umphak an awm lo a, kum khat chuang zet pakhatna a nih tawh lohna MotoGP huangah a chak ber dinhmun a luah leh ta a ni.
TT Circuit Assen-a intlansiakah lap 26 tlan chhuak turin Rossi hian minute 41 leh second 41.149 hun a hmang a, pahnihna Danilo Petrucci nen an inkarah second 0.063 chiah a awm.
A vawi khat nana pole position aṭanga bul ṭantu Johann Zarco-a'n lap hmasa berah hma hruai mah se beisei a phak zui lo a, Tech3 Yamaha rider hi 14-naah a thleng hram.
Lap 15 tlan tur a la awm tihin Rossi hian Zarco lehpelin hmahruaitu a ni a, Ducati rider Petrucci, world champion nilai Marc Marquez leh Andrea Dovizioso te nen lap hnuhnung berah na takin inum mah se hun pawimawhah tawnhriat ngah Rossi a dingchang.
Kum 38 mi Rossi hian Netherlands hmar lamah hian vawi 10 hnehna a channa chiah a ni a, heng zinga pariat hi MotoGP inelna huangah a ni. Italian rider hi a kum tam deuh tawhin a vanglai angin a chak pur pur tawh bik lo, kum 2016 May thla hnua hnehna a chan lehna hmasa ber a ni.
Yamaha rider Rossi hian Grand Prix 115-ah hnehna a chang tawh a, heng zinga 89 ngawt hi inelna sang ber MotoGP-ah niin kum 2009-a nomawi hnuhnung ber a chawi hnuah pawh rider hmuhnawm leh midang tana elpui hautak ber a ni thei zel.
Rossi chuan, "Assen-ah hian hlimna tam tak ka tawng tawh ṭhin a, tun ṭum hi chu kei leh kan team tan a hlu bik hle. Hnehna ka chan vangin world championship-ah pawh hma ka sawn chho zel a, kum tin maiin inelna a hautsak zual zel avangin tha thlah loa kan beih chhunzawm a ngai dawn a ni," tiin a sawi.
Tun season MotoGP intlansiak vawi 8 awm tawh
aṭangin Rossi hian point 108 hmuin rider championship-ah pathumna a ni a, a chungah hian hmahruaitu Andrea Dovizioso (115 points) leh Maverick Vinales (111) te an awm.
Dutch GP-ah tun hnai intlansiak hnuhnung pahniha pakhatna ni thei Dovizioso chu pangana a ni a, season tir aṭanga hmahruaitu Vinales-a'n 11-na
aṭanga bul ṭanin lap 14 tlan tur la awmah a tlan zui thei tawh lo thung. Ducati rider Dovizioso hian point lia Vinales pelin hmahruaitu thar a ni.
Tun season-ah rider an inel tawk rih hle, intiansiak vawi riatah rider panga - Vinales, Marquez, Dani Pedrosa, Dovizioso leh Rossi ten hnehna an chang tawh a, season dang zawng aiin champion tur rinthiam a harsa. Championship hmahruaitu Dovizioso leh Marquez te inkarah pawh point 11 chiah a awm avangin GP pakhata chet fuh dan a zirin an dinhmun a la inthlak thleng hlawk thei.
MotoGP season kal lai a intlansiak 18 awm tur zingah hmabak 10 an la nei a, June 30 khian Sachsenring Circuit-ah German Grand Prix tlan leh a ni ang.
Dutch MotoGP Results
# Rider Ram Team
1 Valentino Rossi Ita Yamaha
2 Danilo Petrucci Ita Ducati
3 Marc Marquez Spa Honda
4 Cal Crutchlow GB Honda
5 Andrea Dovizioso Ita Ducati
6 Jack Miller Aus Honda
7 Karel Abraham Cze Ducati
8 Loris Baz Fra Ducati
9 Andrea Iannone Ita Suzuki
10 Aleix Espargaro Spa Aprilia