Ramhlun North-in Tawia an chelh

MPL club Ramhlun North chuan season liam taa an coach Lalruatliana Sailo (Tawia) chu season thara an chhawr chhun­zawm tur thu an facebook page-ah an tarlang.

AFC B Licence leh NIS coaching certificate nei Tawia hian Ramhlun North hi MPL5 qualifier-ah champion puiin Mizo­rama inelna sang ber a tlin pui a, I Day Football-ah final lut nghalin I League club Aizawl FC lakah an vanduai a, MFA Super Cup leh MPL an khar ṭhat loh avangin season tharah result ṭha zawk neih tumin hma an la mek.

Mizoram State Sports Council hnuaia coach Tawia chuan, "Season thar atan kar khat kan in­puahchah tawh a, kan duh ang thlap team la din lo mah ila kan player lak chinah ka lungawi khawp mai. Sang tak thlen pui theih tur player ka nei dawn a, theihtawp kan chhuah ang," tiin Vanglaini a hrilh a, RNFC pawhin an thuchhuahah MSSC-in coach an hawh­tir avanga an lawm thu an ziak lang bawk.

Ramhlun North hian ONGC captain V. Lal­chhuanawma chu an player lak hmasa ber ni turin an ziak lut tawh a, season liam taa an player pawimawh AIFF Academy aṭanga inzir chhuak Lalramzauva Khiangte bakah defender ṭha C. Ramdinmawia leh Liansangpuia te an chelh thei a, tawnhriat nei player hi team uap turin an pawimawh ang.

I Day Football finalist hian Thingsul Tlangnuam defender Lalramfelpuia chu Chhinga Veng aṭang­in an lalut a, Zo United aṭangin Mizoram winger Jesse Laldinpuia, Guwahati club ṭha ASEB captain leh striker Jessy Vanlalmuana leh Aizawl FC Academy aṭanga inzir chhuak Mal­sawmtluanga chu right back turin an la tawh bawk.