Australia tana vawi 100 inlan thei Cahill

Tim Cahill chuan Pathianni zan khan Aus­tralia tan inlanin ram tana vawi 100 a inlanna chiah a ni a, Socceroos-in Chile lakah point khat hlawk chhuakin semifinal luh nan tawk lo mah se Everton midfielder hlui thlen chin hi a ropui a ni.

Australia coach Ange Postecoglou chuan, "Ram tana vawi 100 a khelh dawn chuan ka duhsak vang ni loin a phu vang a ni ang," tiin Cahill chungchang a sawi lawk a, Chile nena an khelh ṭuma Socceroos player pawimawh a la nih theih avangin duhsak vanga khelmual lut a ni lo.

Cahill hian kum 37-a upa a nihin ram tan vawi 100-na a khel chauh a, hei hi Australia tana a inlan tlai vang a ni. Sydney-a piang ni mah se kum thum chhung an naupan laia a chen tawhna Samoa youth team tan a inlan hmasa a. Hetihlaia FIFA danah chuan senior team-ah pawh youth team tana an khelhna ramah an khelh a ṭul a ni.

Millwall aṭanga inzir chhuak Cahill hi club-a amah enkawltu Mick McCarthy-a'n Republic of Ireland tana khel turin a sawm a, amaherawhchu Samoa tana a khelh tawh avangin 2002 FIFA World Cup-ah a inlan thei ta lo.

Kum 2004-ah FIFA-in an dan thlakin player-te chu youth team-a an khelhna ram chu senior team-ah thlak an phal sak a. Hetih hunlai hian kum 24-a upa a ni tawh a, Cahill hian England, Ireland, Australia leh Samoa ah te duh thlang thei niin a pianna ram tana khelh a thlang.

Cahill hian Australia hi OFC Nations Cup (2004) leh AFC Asian Cup (2015) te a champion pui a, Australian zinga World Cup leh Asian Cup a pet goal hmasa ber a ni a. FIFA World Cup-ah bik phei chuan Australia tana goal khung tam ber a ni.

Everton midfielder hlui Cahill chuan, "FIFA-in khelh min phalsak tih ka hriat khan ka mittui a tla hial a ni. Professional foot­baller ni turin theih­tawp kan chhuah a, ram tana khelh theih loh chu a hrehawm. Chuvangin ram tana ka khel thei hi ka lawm a, theihtawp ka chhuah a, vawi 100 lai ka inlan thei hi ka inchhuang hle," tiin a thlen china a lawm thu a sawi.

Australian midfielder hian Millwall aṭangin Ever­ton-ah khawvel hriatin hming a chher a, hemi zawh hian New York Red Bulls, Shanghai Shenhua leh Hangzhou Greentown tan khel leh tawhin tunah chuan A League club Melbourne City tan a khel mek.